रुईची टक्‍केवारी ग्राह्य धरल्यास कापसाला मिळेल अधिक दर

नागपूर ः कापसाचे भाव ठरविण्यासाठी त्यातील रुईच्या टक्‍केवारीचा विचार व्हावा, अशी मागणी आता पुढे येऊ लागली आहे. सद्यःस्थितीत कापसाचे दर ठरविताना सरासरी ३३ ते ३४ टक्‍के इतकेच रुईचे प्रमाण अपेक्षित धरले जाते. त्यापुढील प्रत्येक टक्‍क्‍याला १०० रुपये जादा दर मिळणार असल्याने त्याकरिता जिनिंगची सुविधादेखील बाजार समितीस्तरावर शासनाने उपलब्ध करण्याची गरज अधोरेखित होत आहे.

कापूस प्रक्रिया उद्योग क्षेत्रातील सूत्रांनी दिलेल्या माहितीनुसार, देशात १८ कोटी क्‍विंटल कापूस उत्पादन होते. कापसाला ५००० रुपये प्रतिक्‍विंटल असा दर अपेक्षित धरल्यास देशार्गंत ९० हजार कोटी रुपयांची उलाढाल कापूस उद्योगात होते. परंतु कापसाचे दर ठरविण्यासाठी जागतिक स्तरावर असलेल्या निकषांऐवजी रुईची टक्‍केवारी ३३ ते ३४ टक्‍के गृहीत धरली जाते. त्यामुळे कापूस उत्पादकांचे मोठे नुकसान होत असल्याची माहिती सूत्रांनी दिली.

वर्धा जिल्ह्यात रुईची टक्‍केवारी काढून २०१६-१७ या हंगामात दर दिला गेला होता. या माध्यमातून क्‍विंटलमागे ५०० रुपये जादा कापूस उत्पादकांना मिळाले होते. सध्या अस्तित्वात असलेल्या वाणांमध्ये ३७ ते ४२ टक्‍के रुईचे प्रमाण आहे. परंतु शेतकऱ्यांकडील कापसाचे भाव ठरविताना ३३ ते ३४ टक्‍के रुईचे प्रमाण अपेक्षित धरले जाते, त्यामुळे शेतकऱ्यांकडील जास्त रुईचे प्रमाण असलेल्या कापसालादेखील जास्त भाव मिळू शकत नाही.त्याकरिता बाजार समितीस्तरावर रुई तपासणीसाठी जिनिंगची व्यवस्था असण्याची गरज तज्ज्ञ उद्योजकांनी व्यक्‍त केली आहे.