पुणे ः गेल्या काही दिवसांपासून राज्यातील उकाड्यात सकाळपासून वाढ होत आहे. कमाल तापमानाचा पारा चाळीस अंश सेल्सिअसच्या वर गेला आहे. येत्या दहा ते पंधरा दिवसात पुन्हा तापमानात सरासरीच्या तुलनेत दोन ते चार अंश सेल्सिअसपर्यंत वाढ होण्याची शक्यता आहे. शुक्रवारी (ता. १३) सकाळी आठ वाजेपर्यंत विदर्भातील चंद्रपूरमध्ये ४१.३ अंश सेल्सिअसची देशातील उच्चांची तापमानाची नोंद झाली असल्याचे हवामान विभागाच्या सूत्रांनी सांगितले. गेल्या आठवड्यापासून राज्यातील काही भागात सकाळी दहा वाजल्यापासून उकाडा जाणवायला सुरवात होत आहे. दुपारी उन्हाच्या कडाक्यामुळे तापमानाचा पारा चाळिशी ओलांडत आहे. दुसरीकडे अचानक काही भागात ढगाळ हवामान होत आहे. त्यामुळे जोरदार वारा, गारा, मेघगर्जनेसह जोराचा पाऊस पडत आहे. हा पाऊस दिलासा देणारा वाटत असला तरी तापमानात किंचित घट होत आहे. बंगालचा उपसागर आणि श्रीलंका, कोमोरिन परिसरात चक्राकार वाऱ्यांची स्थिती तयार होत आहे. ही स्थिती समुद्रसपाटीपासून सुमारे दीड किलोमीटर उंचीवर आहे. त्यातच तमिळनाडूचा दक्षिण भाग ते कर्नाटकाच्या उत्तर भागात चक्राकार वाऱ्याची स्थिती आहे. ही स्थिती कर्नाटक, तमिळनाडू, केरळ या भागात सरकण्याची शक्यता आहे. उत्तरेकडील मध्य प्रदेश, गुजरात या भागातही चक्राकार वाऱ्याची स्थिती आहे. त्याचा परिणामही राज्यातील वातावरणावर होण्याची शक्यता आहे. आज (शनिवारी) कोकण, मध्य महाराष्ट्र आणि मराठवाड्यात कोरडे हवामान राहण्याची शक्यता आहे. विदर्भात तुरळक ठिकाणी मेघगर्जनेसह जोरदार पाऊस पडण्याची शक्यता आहे. उद्यापासून (ता. १५) कोकण, मध्य महाराष्ट्र आणि मराठवाड्यात काही ठिकाणी जोरदार वारा सुटून मेघगर्जनेसह गारांचा पाऊस होण्याचा अंदाज आहे. विदर्भात कोरडे हवामान राहील. त्यामुळे वातावरणात काही ठिकाणी ऊन-सावल्यांचा खेळ सुरू राहणार असून उकाड्यात वाढ होण्याची शक्यता आहे. शुक्रवारी (ता. १३) सकाळी आठ वाजेपर्यंतचे कमाल तापमान (अंश सेल्सिअस) ः मुंबई (सांताक्रूझ) ३२.५, अलिबाग ३२.२, रत्नागिरी ३३.७, डहाणू ३४.१, पुणे ३७.६ नगर ३९.४, जळगाव ३९.८, कोल्हापूर ३६.८, महाबळेश्वर ३३.५, मालेगाव ४०.०, नाशिक ३६.५, सांगली ३९.०, सातारा ३७.१, सोलापूर ३९.१, औरंगाबाद ३७.०, परभणी शहर ३९.४, नांदेड ३८.५, अकोला ३९.५, बुलडाणा ३८.४, ब्रह्मपुरी ३९.७, चंद्रपूर ४१.३, नागपूर ३८.९, वाशीम ३७.०, वर्धा ३९.०, यवतमाळ ३८.०.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.