गाईच्या दूध खरेदी दरात ‘गोकुळ’कडून २ रुपये कपात

कोल्हापूर (प्रतिनिधी) : गाईचे दूध शिल्लक राहून संघाला तोटा होत असल्याचे कारण देत कोल्हापूर जिल्हा दूध संघाने (गोकुळ) बुधवार (ता. १) पासून गायीच्या दुधाच्या खरेदी दरात लिटरमागे दोन रुपयांनी कपात केली आहे.

सध्या ३.५ फॅट व ८.५ एसएनएफला गोकुळ दूध संघ उत्पादकांना प्रतिलिटर २७ रुपये इतका प्रतिलिटर दर देतो. यात दोन रुपयांनी कपात केल्याने आता हा दर २५ रुपये इतका होणार आहे. याच प्रमाणात खालील फॅट व एसएनएफनुसार दर कमी होतील. मंगळवारी (ता.३१) सायंकाळी झालेल्या बैठकीत हा निर्णय झाल्यानंतर बुधवार (ता. १) पासून या दराने खरेदी सुरू झाली.

येत्या दोन दिवसांत याबाबतची लेखी माहिती गावागावांतील दूध संकलन केंद्रांना पाठविण्यात येणार असल्याची माहिती गोकुळकडून देण्यात आली. गोकुळकडे दररोज साडेसहा लाख लिटर दुधाचा पुरवठा विविध दूध संस्थांकडून होतो. यापैकी सध्या साडेतीन लाख लिटर दूध शिल्लक राहत असल्याचे गोकुळच्या प्रशासनाने सांगितले.