वाघोबाच्या आक्रमणाला गुराख्याच्या कल्पक चिलखताचे आव्हान

संग्रहित छायाचित्र
संग्रहित छायाचित्र

यवतमाळ : राळेगाव तालुक्‍यात नरभक्षक वाघाने आतापर्यंत नऊ जणांचा बळी घेतला. त्यामुळे शेतकऱ्यांसह शेतमजूर शेतात व जंगलात जाण्यासाठी धजावत नाहीत. उदरनिर्वाहासाठी काम केल्याशिवाय दुसरा पर्याय नसल्याने गुराख्याने संरक्षणासाठी टाकाऊ वस्तूंपासून चिलखत बनविले आहे.

शंकर आत्राम असे शेतकऱ्याचे नाव आहे. राळेगाव, पांढरकवडा, मारेगाव आदी तालुक्‍यांत वाघाची दहशत आहे. नऊ जणांचा बळी घेणाऱ्या वाघाला जेरबंद करण्यात वन विभागाला अद्याप यश आले नाही. राळेगाव तालुक्‍यातील बोराटी येथील शंकर आत्राम या गुराख्याने जंगलात जाताना वाघाच्या हल्ल्यापासून बचाव करण्यासाठी घरगुती साहित्यातून चिलखत तयार केले आहे. हे चिलखत संरक्षणासह कौतुकाचा विषय ठरत आहे.

आत्राम हे गेल्या २५ वर्षांपासून गुराखी म्हणून काम करीत आहे. अनेकदा त्यांच्या जंगलातील वन्यप्राण्यांसोबत आमना-सामना झाला. तीन वेळा व्याघ्रदर्शन झाले. आता मात्र, वाघाकडून होणाऱ्या हल्ल्यामुळे आत्राम हादरून गेले. पशुधनाला घेऊन जंगलात जाण्याशिवाय दुसरा पर्याय नाही. त्यामुळे स्वतःचे संरक्षण करण्यासाठी घरगुती टाकाऊ वस्तूंपासून चिलखत तयार केले आहे. चिलखत घालूनच गुराख्याची घरातून जंगलाकडे होणारी ‘एंट्री’ वाघाला आव्हान देणारी ठरत आहे. युक्तीतून बचावाच्या संदेशाची चर्चा तालुक्‍यात होत आहे.

टाकाऊ वस्तूंचा वापर छाती व शरीराच्या पाठीमागचा भाग तेलाच्या खाली पिंपापासून तयार केला आहे. वाघ सर्वांत आधी गळ्याला पकडतो. यातून बचावासाठी लोखंडी पत्र्याचा एक पट्टा तयार केला आहे. शंकर छाती व मानेवरील पट्याला कुलूप लावतो. जेणे करून एखाद्या धक्‍क्‍याने ते निघून जाऊ नये. दोन्ही कुलपांची किल्ली पिशवीत ठेवतो. कंबरेखालील भागाच्या संरक्षणासाठी तारांपासून हाप पॅंट तयार केली आहे. डोक्‍यात जुने हेल्मेट घालतो. टाकाऊ वस्तूंचा लीलया वापर करून चिखलत बनविले. ते परिधान केल्यानंतर जणू काही योद्धाच आपल्यापुढे उभा आहे, असा अनुभव अनेकांना येत आहे.

जंगलक्षेत्रात वाघाची दहशत आहे. रोज सकाळी गावातील पशुधन घेऊन सकाळी दहाला जंगलाकडे निघतो. सायंकाळी सहाला पशुधनाला घेऊन गावाकडे येतो. चिलखत तयार केल्याने वाघाची भीती वाटत नाही. - शंकर आत्राम, रा. बोराटी, ता. राळेगाव

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com