सांगली जिल्ह्यात थंडीमुळे द्राक्षावर ‘क्रॅकिंग’, ‘भुरी’चा प्रादुर्भाव

सांगली ः गेल्या चार दिवसांपासून थंडीत वाढ झाली आहे. वाढत्या थंडीमुळे द्राक्ष मण्याचे सेटिंग, मुळीचे काम मंदावले आहे. यामुळे द्राक्ष मण्याची फुगवण कमी होते आहे. काळी सोनाक्का, शरद सिडलेस, नाना परपल, कृष्णा सिडलेस या वाणांच्या द्राक्षांना क्रॅकिंग (तडा पडतोय) सुरू झाले आहे. त्यातच भुरी रोगाचा प्रादुर्भाव झाल्याने शेतकरी चिंताग्रस्त झाला आहे. जिल्ह्यात आगाप छाटणी घेणाऱ्या शेतकऱ्यांची द्राक्ष विक्रीला आली आहेत. डिसेंबरच्या शेवटी आणि जानेवारीत यंदा हवामान चांगले राहणार आहे. जानेवारीच्या शेवटचा आठवडा आणि फेब्रुवारीच्या पहिल्या आठवड्यात पुन्हा कडाक्याच्या थंडीची शक्‍यता आहे. या हवामान अंदाजाचीही शेतकऱ्यांनी धास्ती घेतली आहे. परिणामी शेतकऱ्यांना १३ ते १५ फेब्रुवारीनंतरच यंदा चांगले वातावरण राहण्याची शक्‍यता द्राक्ष उत्पादक शेतकऱ्यांकडून व्यक्त होत आहे.  जिल्ह्यात सुमारे ४० टक्के द्राक्ष उत्पादक शेतकऱ्यांनी उशिरा फळ छाटणी घेतली आहे. काही ठिकाणी या द्राक्ष बागा सध्या फुलोरा अवस्थेत आहेत. मात्र, दिवसेंदिवस वाढणारी थंडी व घडावर पडणारे दवबिंदू यामुळे घड कुजू लागले आहेत. त्यातच अगोदर घेतलेल्या द्राक्ष छाटणीतील द्राक्षांचे मणी मोठे झाले आहेत. पण थंडीमुळे त्याची वाढ होत नाही. त्यामुळे द्राक्ष उत्पादक शेतकरी संकटात सापडला आहे.  नोव्हेंबर महिन्याच्या शेवटी द्राक्ष बाजारात आली. त्यावेळी १०० रुपये किलो दर मिळाला. त्यात बदलत्या वातावरणामुळे द्राक्षावर दावणी, भुरीचा प्रादुर्भाव वाढला आणि हजारो रुपये खर्चात भर पडली.  व्यापारी पाडतायेत दर  थंडीत द्राक्ष पिकाला उठाव व्हायला हवा, मात्र द्राक्ष व्यापारी थंडीच्या काळात उठाव होत नसल्याची वातावरण निर्मिती करून दर पाडतात, असा अनुभव सध्या शेतकऱ्यांना येतो आहे. त्यामुळे तयार द्राक्ष उत्पादक शेतकऱ्यांमध्ये चिंतेचे वातावरण आहे. साध्या द्राक्ष पेटीला ३०० आणि काळ्या द्राक्षाला ३६० ते ४०० रुपये दर मिळतो आहे. तर कमी दर्जाच्या द्राक्षांना कमी दर मिळतो आहे. येत्या चार दिवस थंडी राहिली तर परस्थिती आणखी गंभीर होण्याची शक्‍यता आहे.