खरेदी केंद्र मिळविण्यासाठी आता निकष परीक्षा

अकोला : शासकीय खरेदी केंद्र सुरू करण्यासाठी यापुढे निकष परीक्षा उत्तीर्ण करावी लागणार असून, आवश्‍यक मनुष्यबळ सेवा व तांत्रिक योग्यता असेल, अशाच ठिकाणी खरेदी केंद्र सुरू करण्याची परवानगी दिली जाईल. याबाबत निकषपूर्तता तपासणीची जबाबदारी जिल्हा उपनिबंधकांकडे सोपविण्यात आली आहे.  काही वर्षांपासून शासकीय शेतीमाल खरेदी केंद्रांवर सुरू असलेला गोंधळ शेतकऱ्यांसाठी मोठा डोकेदुखी ठरत आहे. प्रत्यक्ष शेतीमाल विक्रीपूर्वी शेतकऱ्यांनी ऑनलाइन नोंदणी करावी. निर्धारित आर्द्रतेचा, गुणवत्तेचा शेतीमालच हमीभावात खरेदी, प्रति एकरी शेतीमाल खरेदी मर्यादा, कागदपत्रांचे निकष वेगळेच. यानंतरही खरेदी केंद्रांवर आवश्‍यक मनुष्यबळ सेवा किंवा तांत्रिक योग्यतेच्या अभावाने वर्षोगणती, उत्पादित शेतीमालापैकी निम्मा मालही शासकीय केंद्र खरेदी करू शकले नाही. एका बाजूला सरकारने शेतकऱ्यांसाठी ठरवून दिलेले जाचक निकष व दुसरीकडे केंद्रांवर भेडसाविणाऱ्या तांत्रिक व मनुष्यबळ उपलब्धतेच्या समस्या शासकीय शेतीमाल खरेदीतील मोठी समस्या झाली आहे. त्यामुळे यापुढे ज्या ठिकाणी शासकीय खरेदी केंद्र सुरू करायचे असेल, त्या ठिकाणी आधी खरेदी-विक्री संघाला मनुष्यबळ सेवा व इतर निकषांची हमी द्यावी लागणार आहे. 

शासकीय शेतीमाल खरेदी केंद्र सुरू करण्याबाबत अद्याप शासनाकडून निर्देश मिळाले नाहीत. परंतु आवश्‍यक मनुष्यबळ सेवा व तांत्रिक योग्यता सिद्ध करणाऱ्या ठिकाणीच केंद्र देण्याबाबत जिल्हा उपनिबंधकांना शासनाचे निर्देश असल्याची माहिती आहे.  - राजेश तराळे, जिल्हा मार्केटिंग अधिकारी, अकोला