अकोला : बुलडाणा व अकोला जिल्ह्यातील काही तालुक्यांमध्ये दमदार पाऊस झाला. या पावसामुळे बुलडाणा तालुक्यातील नद्यांना पूर आला. या पुरांमुळे जीवितहानी झाली नसली, तरी नदीकाठांवरील शेतांमधील पिकांचे अतोनात नुकसान झाले.
बुलडाण्यात पुराच्या पाण्यात एक म्हैस वाहून गेल्याची माहिती मिळाली अाहे. दुसरीकडे अकोला जिल्ह्यातील अकोट तालुक्यात उमरा व पणज या दोन मंडळांमध्ये अतिवृष्टी झाली. पणजमध्ये या मोसमात सर्वाधिक १२० तर उमरा मंडळांत १०० मिमी पाऊस नोंदविला गेला. पावसामुळे या भागातील पूर्वहंगामी कापूस अोला झाला. सोंगणी केलेल्या सोयाबीनचेही मोठे नुकसान झाले अाहे.
वऱ्हाडात गेले तीन दिवस पावसाळी वातावरण होते. काही ठिकाणी जोरदार तर काही ठिकाणी रिमझिम पाऊस झाला. मंगळवारी (ता. १०) दुपारी झालेल्या जोरदार पावसामुळे बुलडाणा तालुक्यातील धाड परिसरात सर्वच नदी-नाल्यांना पूर आले. धाड येथील बाणगंगा नदीला मोठा पूर गेला. यामुळे करडी धरण एकाच पुरात अोव्हरफ्लो झाले. बाणगंगेचे पाणी धाड-धामणगाव रस्त्यावरील पुलावरून वाहल्यामुळे या गावांचा संपर्क तुटला होता. जवळपास तीन ते चार तास पाणी वाहत होते. या पुरामुळे नदीकाठावरील शेतातील पिकांचे नुकसान झाले अाहेत.
धाड येथील गणेश बंडू गायकवाड यांची तीन एकरांतील सोंगणी केलेला मका पुरात वाहून गेला. यामुळे सुमारे दीड लाखाचे नुकसान झाले. शिवाय स्प्रिंकलर सेट (३० हजार), मोटर पंप (२० हजार) असे मिळून दोन लाखांचे नुकसान झाले. इतर शेतकऱ्यांचेही मोठे नुकसान झाले. सोंगणी केलेल्या सोयाबीनच्या सुड्यांमधून कोंब बाहेर निघू लागले अाहेत. या नुकसानीचा प्रशासनाकडून अाढावा घेण्याची प्राथमिक सूचना देण्यात अाली अाहे.