शेत विकण्याची आलीय वेळ !

मनमाड, जि. नाशिक : पाऊस पडला, शेत पेरायचं, खिशात दमडी नाही, बीभरण कुठून आणायचं, सोसायटीतून कर्ज मिळेना. शेवटी सावकाराच्या दारात जाण्याची वेळ शासनानं आणली असून, कर्जमाफीचं केवळ गाजर दाखवलंय. प्रत्यक्षात काहीच नसल्यानं शेत विकण्याची वेळ ओढवल्याची कैफियत वंजारवाडीच्या चिंतातुर शेतकऱ्यांनी शनिवारी (ता. ३०) मांडली. शासनाने कर्जमाफी केल्याने पुन्हा कर्ज मिळेल असे वाटले होते. पण तसे न झाल्याने आमच्या भागात पाऊस होऊन शेतीची कामे सुरू झाली. पण खिशात दमडी नसल्याने बीभरण, खत आणायचे कुठून? शेत तयार करायला पैसे नाहीत, दुकानदार उधार द्यायला तयार नाही, तर परिसरातील सात गावांच्या वर गावे मनमाड विविध कार्यकारी सहकारी संस्थेशी संलग्न आहेत. मात्र सोसायट्यांना पतपुरवठा करणाऱ्या जिल्हा बॅंकेला शासनाने कर्ज न दिल्याने सोसायट्या शेतकऱ्यांना कुठून कर्ज देतील. जालिंदर जाधव या शेतकऱ्याने दोन लाख कर्ज काढले होते. व्याज-मुद्दल धरून तीन लाख ऐंशी हजार झाले. शासनाची दीड लाख कर्जमाफी मिळाली. जवळ पैसे नसताना सावकार, व्यापाऱ्यांकडून व्याजाने पैसे काढत उरलेले एक लाख ऐंशी हजार भरले. मात्र कर्ज नसल्याचा दाखला देण्याचा जीआरच नसल्याचे सोसायटीकडून सांगण्यात आले. यामुळे ७/१२ उताऱ्यावरील बोजा कमी झाला नाही. राष्ट्रीयीकृत बॅंकेतून कर्ज काढता येईना, सोसायट्या कर्ज द्यायला तयार नाहीत. आता करायचे काय, असा प्रश्‍न जाधव यांनी या वेळी विचारला. सावकाराकडून व्याजाने पैसे काढून कर्जमाफी नसलेली रक्कम भरली. पेरणीचा हंगाम सुरू आहे पण सोसायट्या कर्ज द्यायला तयार नाहीत. शेत विकण्याची वेळ शासनाने आणली आहे. - संजय जाधव, शेतकरी, वंजारवाडी शासनाने कर्जमाफी झाली म्हणून सांगितले; पण उताऱ्यावरचा बोजाही कमी झाला नाही. मागच्या वर्षी उत्पादन न झाल्याने यंदा जवळ पैसे नाहीत. त्यामुळे सावकाराकडून पैसे घेऊन बीभरण केले. - दशरथ जाधव, शेतकरी, वंजारवाडी शेतकरी आमच्याकडे रोज चकरा मारून कर्जाची विचारपूस करतात. मात्र जिल्हा बॅंकेलाच पतपुरवठा नसल्याने हतबलता निर्माण झाली  आहे. - सुरेश आहिरे, अध्यक्ष, मनमाड कार्यकारी सहकारी संस्था