पीककर्ज मिळत नसल्याने अकोला जिल्ह्यात उसनवारीचे व्यवहार

अकोला  : खरिपातील पेरण्या सुरू झाल्या असून बाजारपेठेत बियाणे, खते खरेदीची लगबग वाढलेली अाहे. मात्र हजारो शेतकऱ्यांना अद्याप पीककर्ज वाटप झालेले नसल्याने उधारी, हात उसनवारीचे व्यवहार सर्वत्र वाढले अाहेत. शेतकरी बँकांमध्ये सातत्याने चकरा मारत असून पीककर्जासाठी अर्ज दिल्यानंतर बँकांकडून पुढील १० ते १५ दिवसानंतरची मुदत दिली जात अाहे. यामुळे पीककर्ज वाटप कधी होईल, असा प्रश्न सध्या निर्माण झाला अाहे. अकोला जिल्ह्यात सर्व बँकांनी मिळून सोमवार (ता.२५) पर्यंत केवळ १५ टक्के पीककर्ज वाटप केले अाहे.

जिल्ह्यात पीककर्ज वाटपाला एप्रिलपासून सुरवात झाली अाहे. यावर्षी १३३४ कोटी रुपये खरिपात पीककर्ज वाटपाचा लक्ष्यांक ठेवण्यात अाला. मात्र आजवर बँकांनी एक लाख ४० हजार ५११ खातेदार शेतकऱ्यांपैकी केवळ २४ हजार ६६२ शेतकऱ्यांना पीककर्ज वाटप केले. ही रक्कम अवघी २१३ कोटी एवढी आहे.

या आठवड्यात पावसाचे सर्वत्र पुनरागमन झाल्याने बहुतांश शेतकऱ्यांनी पेरणीची तयारी केली. पेरणी करण्यासाठी लागणारे बियाणे, खते खरेदीसाठी शेतकरी बाजारात जात असताना त्याच्याकडे पैशांची चणचण आहे. जिल्ह्यात पात्र खातेदार शेतकऱ्यांपैकी सुमारे एक लाख १५ हजार शेतकरी पीककर्जापासून वंचित अाहेत. 

पीककर्ज वाटप अधिक गतीने करा अशा प्रकारच्या सूचना मंत्री, अधिकारी वारंवार देत अाहेत. जिल्हाधिकाऱ्यांनी तर कॅनरा, ॲक्सिस बँकेतील शासकीय खात्यांचे व्यवहार थांबवले आहेत. येत्या अाठ दिवसांत परिस्थिती न सुधारल्यास त्यांनी सर्वच बँकांना कारवाईचा इशारा सुद्धा दिला. गेल्या महिनाभरापासून प्रशासन बँकांकडे पाठपुरावा करीत असताना बँका मात्र अापली पारंपरिक चाकोरी सोडायला तयार नाहीत.

जिल्ह्यात जून संपायला अालेला असताना अद्याप २० टक्केसुद्धा पीककर्ज वाटप झालेले नाही. सर्व बँकांनी मिळून १३३४ कोटींच्या लक्ष्यांपैकी अवघे २१३ कोटी रुपये पीककर्ज वाटप केले अाहेत. ही टक्केवारी अवघी १५ एवढी अाहे.  

शेतकऱ्यांबाबत राष्ट्रीयीकृत बँकांची भूमिका फारशी चांगली नसल्याचे दिसून येत अाहे. स्टेट बँक अाॅफ इंडियाला खरीपासाठी २११ कोटींचे पीककर्ज वाटपाचे उद्दीष्ट असताना अातापर्यंत केवळ १२ कोटी वाटप केले. जिल्ह्यात अग्रणी बँकेचा दर्जा असलेल्या सेंट्रल बँकेने ९१ कोटींच्या उद्दिष्टापैकी अवघे १० कोटी वाटप केले आहेत. ही कामगिरी ११ टक्के अाहे. जिल्ह्यात असलेल्या सर्व राष्ट्रीयीकृत बँकांनी मिळून १० टक्के पीक कर्ज वाटप केले अाहे. या बँकांना ५०१ कोटींचे उद्दीष्ट देण्यात अालेले असून अाजवर ५५ कोटी रुपये त्यांनी शेतकऱ्यांना पीककर्ज म्हणून दिले अाहेत.