सातारा जिल्ह्यात रब्बीसाठी आतापर्यंत दोन टक्के पीक कर्जवाटप

सातारा : जिल्ह्यातील राष्ट्रीयीकृत तसेच सहकारी बॅंकांकडून शेतकऱ्यांना ऑक्‍टोबरअखेर अवघे दोन टक्के पीककर्जाचे वाटप करण्यात आले आहे. स्टेट बँक अॅाफ इंडिया या बॅंकेने सर्वाधिक चार कोटी ६४ लाखांचे म्हणजेच उद्दिष्टाच्या ५ टक्के कर्जाचे वितरण केले आहे. उर्वरित पाच महिन्यांत ९८ टक्के रब्बी पीककर्ज वितरणाचे बँकासमोर आव्हान आहे.  

जिल्ह्यात रब्बी हंगामासाठी ११२० कोटी रुपये पीककर्जाचे उद्दिष्ट ठेवण्यात आले आहे. यापैकी ऑक्‍टोबर महिनाअखेर २४ कोटी ९८ लाख रुपये कर्जाचे वितरण करण्यात आले आहे. रब्बी हंगामात पीककर्ज वितरण राष्ट्रीयीकृत बॅंकांकडून केले जात आहे. या बॅंकांसाठी ४३९ कोटी ८० लाखांचे उद्दिष्ट असून, यापैकी १४ कोटी तीन लाख रुपयांचे कर्ज वितरण केले आहे. राष्ट्रीयीकृत बॅंकांनी तीन टक्के उद्दिष्ट पूर्ण केले आहे.

राष्ट्रीयीकृत बॅंकांत स्टेट बँक अॅाफ इंडिया या बॅंकेने सर्वाधिक चार कोटी ६४ लाखांचे म्हणजेच उद्दिष्टाच्या ५ टक्के कर्जाचे वितरण केले आहे. यानंतर बँक अॅाफ महाराष्ट्र या बँकेने तीन कोटी ३६ लाखांचे म्हणजेच उद्दिष्टाच्या चार टक्के कर्जाचे वितरण केले. खासगी बॅंकांनी एकूण उद्दिष्टापैकी सहा टक्के कर्जवाटप केले आहे. खासगी बॅंकांत एचडीएफसी या बॅंकेने ३ कोटी ७६ लाख कर्ज वितरण केले आहे. सातारा जिल्हा मध्यवर्ती बँकेने तीन कोटी ८६ लाख कर्ज वितरण केले आहे. जिल्हा बॅंकेने एकूण उद्दिष्टापैकी एक टक्के कर्जाचे वितरण केले आहे.

रब्बी पीककर्ज वितरण सुरू होऊन एक महिना उलटला असून, कर्ज वितरण करण्याची मार्चअखेरपर्यंत मुदत आहे. यामुळे उर्वरित पाच महिन्यांत सर्व बॅंकाना कर्जाचे उद्दिष्टे पूर्ण करावे लागणार आहे. रब्बी हंगाम हा माण, खटाव, कोरेगाव, फलटण व खंडाळा या दुष्काळी तालुक्‍यांचा प्रमुख हंगाम असल्याने या तालुक्‍यात रब्बी कर्ज जास्त प्रमाणात वितरण केले जाते. मात्र या तालुक्यात सध्या दुष्काळी परिस्थिती निर्माण झाली असल्याने कर्जाचे उद्दिष्ट कितपत पूर्ण होते ते पाहावे लागणार आहे.