सातारा जिल्ह्यात ५० टक्के पीककर्ज वितरण

सातारा ः जिल्ह्यात खरीप हंगामासाठी १६८० कोटी रुपयांचे पीककर्ज वाटपाचे उद्दिष्ट ठेवण्यात आले आहे. त्यापैकी १५ जूनपर्यंत ८४२ कोटी ९९ लाख रुपये म्हणजेच उद्दिष्टाच्या ५० टक्के पीककर्ज वाटप करण्यात आले. त्यामध्ये सातारा जिल्हा मध्यवर्ती सहकारी बॅंकेने सर्वाधिक ७२४ कोटी २४ लाख रुपयांचे पीककर्ज वाटप केले आहे.

खरिपासाठी सप्टेंबरपर्यंत कर्जवाटपाची मुदत असून, त्याकरिता साडेतीन महिने बाकी राहिले आहेत. खरीप हंगामासाठी जिल्ह्याला १६८० कोटी कर्जवाटपाचे उद्दिष्ट आहे. आतापर्यंत दिलेल्या उद्दिष्टाच्या ५० टक्के वाटप झाल्याचे आकडेवारीवरून दिसून येते. बॅंकनिहाय हेच आकडे पाहता, कर्जवाटपाची टक्केवारी कमी होते. जिल्ह्यातील सर्वाधिक शेतकरी हे सातारा जिल्हा बॅंकेशी व त्यानंतर बॅंक ऑफ महाराष्ट्र, स्टेट बॅंकेशी जोडलेले आहेत.

पीककर्ज वाटपात जिल्हा मध्यवर्ती बॅंक आघाडीवर असून, या बॅंकेस या हंगामात ८१० कोटींचे पीककर्ज वाटप उद्दिष्ट होते. त्यापैकी या बॅंकेने ७२४ कोटी २४ लाख रुपयांचे वाटप केले असून, ८९ टक्के उद्दिष्ट पूर्ण झाले आहे. बॅंक ऑफ महाराष्ट्रला १५० कोटी उद्दिष्ट होते. त्यापैकी या बॅंकेने ३० कोटी ६८ लाख रुपयांचे वाटप केले असून, २० टक्के उद्दिष्ट पूर्ण झाले आहे. स्टेट बॅंक ऑफ इंडियाने १५० कोटी रुपयांच्या उद्दिष्टांपैकी ३१ कोटी ३५ लाख रुपये म्हणजेच उद्दिष्टांच्या २१ टक्के कर्जाचे वितरण केले. बॅंक ऑफ इंडियाने १३८ कोटी रुपयांच्या उद्दिष्टापैकी १२ कोटी १८ लाख रुपये म्हणजेच ९ टक्के वाटप केले आहे.

जिल्ह्यात पीककर्ज वाटपात राष्ट्रीयीकृत व खासगी बॅंकांकडून दुर्लक्ष केले जात आहे. जिल्ह्यात कार्यरत असलेल्या २१ राष्ट्रीयीकृत बॅंकांनी १५; तर खासगी बॅंकांनी अवघे आठ टक्के कर्ज वितरण केले आहे. रब्बी हंगामाप्रमाणे या खरीप हंगामात पीककर्ज वितरणाबाबत उदासीन असल्याचे दिसून येत आहे.