पुणे विभागात ९९८ पीककापणी प्रयोग पूर्ण

पुणे : पिकांची नुकसानभरपाई निश्चित करण्यासाठी दरवर्षीप्रमाणे यंदाही पीक कापणी प्रयोग घेण्यात येत आहेत. चालू वर्षी खरीप हंगामातील पिकांचे पंतप्रधान पीकविमा योजनेअंतर्गत २८६ महसूल मंडलांत चार हजार ८३८ कापणी प्रयोग घेण्यात येणार आहेत. त्यापैकी आतापर्यंत ९९८ पीक कापणी प्रयोग पूर्ण झाल्याची माहिती पुणे विभागाचे विभागीय सहसंचालक विजयकुमार इंगळे यांनी दिली.

पिकांच्या दर हेक्टरी सरासरी उत्पन्नाचे जिल्हा व राज्य पातळीवर विश्वासार्ह अंदाज काढणे, नुकसानभरपाई निश्चित करण्यासाठी तीन ते पाच वर्षांची सरासरी उत्पन्नाची आकडेवारी उपलब्ध करणे, पिकांची पैसेवारी निश्चित करण्यासाठी तालुका पातळीवर दहा वर्षांची पिकांच्या सरासरी उत्पन्नाची आकडेवारी उपलब्ध करणे, पीकविमा योजनेसाठी मंडल स्तरावरील चालू वर्षी मिळालेल्या पिकांच्या दर हेक्टरी उत्पन्नाची माहिती पीकविमा कंपनीस कळविण्यासाठी दरवर्षी पीक कापणी प्रयोग घेण्यात येतात.

त्यासाठी कृषी विभागातील सर्व पातळीवरील अधिकारी पिकांच्या उत्पादनाचा रँडम पद्धतीने अंदाज काढतात. या वेळी महसूल विभागाचे तलाठी, जिल्हा परिषदेचे ग्रामसेवक आदी उपस्थित असतात. त्यासाठी विशेष काळजी घेतली जात आहे.

पीक कापणी प्रयोगामध्ये जिरायती व बागायती भात, जिरायती व बागायती भात, जिरायती व बागायती बाजरी, मका, तूर, उडीद, मूग, भुईमूग, कारळा, सोयाबीन, तीळ, नाचणी कापूस, तीळ, सूर्यफूल आदी पिकांचे पीक कापणी प्रयोग घेतले जात आहे. मूग आणि उडीद पिकांचे पीक कापणी प्रयोग घेऊन, त्यांची माहिती कंपनीला सादर करण्याची अंतिम मुदत १५ नोव्हेंबर आहे.

कृषी विभागातील अधिकाऱ्यांनी मुगाचे ४३२ आणि उडदाचे २१६ पीक कापणी प्रयोग घेतले असून, त्यांची माहिती कंपनीला सादर केली आहे. जिरायती व बागायती बाजरीचे १०६४ पैकी ३५० पीक कापणी प्रयोग घेतले आहे. सध्या त्यांची माहिती संकलित करण्याचे कामे सुरू असून, उर्वरित पीक कापणीचे कामे सुरू आहेत. यंदा विभागातील नगर जिल्ह्यात एकूण एक हजार ९३८ पीक कापणी प्रयोग घेतले जाणार आहे. पुणे जिल्ह्यात एक हजार ३८६, सोलापूर जिल्ह्यात एक हजार ५१४ पीक कापणी प्रयोग घेतले जाणार आहेत.

सध्या मूग आणि उडदाचे पीककापणी प्रयोग पूर्ण झाले आहेत. बाजरीचेही साडेतीनशे प्रयोग पूर्ण झाले आहे. उर्वरित पिकांचे टप्प्याटप्प्याने पीक कापणी प्रयोग घेऊन त्यांची माहिती संकलित करून विमा कंपनीला व आयुक्त कार्यालयाला जमा केली जाईल. - विजयकुमार इंगळे, विभागीय अधीक्षक कृषी अधिकारी.