बुलडाण्यात पावसाअभावी पिकांना फटका बसण्याची शक्यता

बुलडाणा   ः या खरिपात पुन्हा दुसऱ्यांदा पावसाचा मोठा खंड पडला असून याचा कालावधी वाढत चालल्याने सोयाबीन, कपाशी या प्रमुख पिकांना फटका बसण्याची शक्यता अाहे. जुलै-अाॅगस्टमध्ये पहिला अाणि अाता दुसरा खंड अाॅगस्ट-सप्टेंबर दरम्यान तयार झाला अाहे. सध्या सोयाबीन पीक शेंगा पकडणे, परिपक्व होण्याच्या स्थितीत असून सर्वत्र पावसाची नितांत गरज अाहे.

जिल्ह्यात १५ ते २२ अाॅगस्ट दरम्यान पाऊस झाला. त्यानंतर पुन्हा पाऊस गायब झाला अाहे. अाता हा खंड १५ दिवसांपेक्षा अधिक होत चालला अाहे. दररोज उगवणारा दिवस कोरडा जात असून यामुळे शेतकऱ्यांची चिंता वाढत चालली अाहे. या हंगामात वऱ्हाडातील अन्य जिल्ह्यांच्या तुलनेत बुलडाणा जिल्ह्यात सर्वात कमी पाऊस झाला अाहे. जिल्ह्यात सरासरीच्या ४३१ मिमी पाऊस झाला असून त्याची टक्केवारी ६४.६६ एवढी अाहे.

पावसाळा सुरू होऊन अाता जवळपास तीन महिन्यांचा कालावधी पूर्ण झाला अाहे. मागील काही दिवसांत सोयाबीन, कपाशी या पिकांना दुसऱ्यांदा ताण सहन करावा लागतो अाहे. या पिकांची ही अवस्था नेमकी महत्त्वाची अाहे. सोयाबीन पीक हे शेंगा परिपक्व होण्याच्या अवस्थेत अाहे. या अवस्थेत पिकाला पाण्याचा ताण मारक ठरू शकतो. कोरडवाहू कपाशी वाढीच्या स्थितीत असून लवकरच फूल, पात्यांवर येणार अाहे. या काळात पावसाची गरज वाढते.

जिल्हाभर मुगाची काढणी सुरू झाली. उडदाचीही येत्या काळात काढणी सुरू होईल. पिकांची अवस्था चांगली दिसत असली तरी  पावसाच्या ताणामुळे उत्पादकता किती येईल हे कुणीही निश्चित सांगू शकत नाही.

रब्बीची अाशा शेवटच्या पावसावर जिल्ह्यात कमी पावसामुळे प्रकल्पांतील पाणीसाठ्यावर परिणाम झाला आहे. एकही प्रकल्प भरलेला नाही. नळगंगा प्रकल्पात १३.१० दलघमी म्हणजेच १८.९० टक्के पाणीसाठा अाहे. खडकपूर्णा या सर्वात मोठ्या प्रकल्पात शून्य टक्के पाणीसाठा अाहे. रब्बी हंगाम हा सप्टेंबरमधील पावसावर अवलंबून असतो. यामहिन्यात पाऊस झाला तर रब्बी लागवडीला पोषक होऊ शकते. मुळात प्रकल्पातील पाणीसाठा अद्यापही ५० टक्क्यांच्या अात असल्याने रब्बीसाठी पाणी मिळणेही अागामी पावसावरच अवलंबून अाहे. येणाऱ्या पावसावरच रब्बीचे क्षेत्र निश्चित होईल.