साताऱ्यात पावसाअभावी पिके करपू लागली

सातारा  : जिल्ह्यात सुमारे एक महिन्यापासून पावसाने दडी मारल्याने खरिपातील पिके पाण्यावाचून करपू लागली आहे. सरासरी इतका पाऊस होऊनही पिकांच्या आवश्यकतेनुसार पाऊस नसल्याने ही स्थिती निर्माण झाल्याचे दिसत आहे.

जिल्ह्यात खरिपाच्या सुरवातीपासून पावसाने दमदार हजेरी लावली होती. यामुळे शेतकऱ्यांनी मोठ्या उत्साहात पेरण्या केल्या होत्या. या हंगामात सरासरीपेक्षा जास्त पेरण्या झाल्या होत्या. यामध्ये सोयाबीन, बाजरी, भात, भुईमूग आदी पिकांचा समावेश आहे. त्यानंतर पाऊस दमदार सुरूच राहिल्याने पिकांची वाढ जोमदार झाली होती. त्यामुळे हा खरीप फायदेशीर ठरणार अशी अाशा शेतकऱ्यांमध्ये निर्माण झाली होती. या पावसाने जिल्ह्यातील प्रमुख धरणांत ९५ टक्क्यांवर पाणीसाठा झाला.

याच दरम्यान पिकांची भरणी सुरू झाली असतानाच पावसाने दडी मारल्याने पिके भरण्यावर परिणाम झाला आहे. सप्टेंबर महिना सुरू झाल्यावर तर कडक ऊन पडण्यास सुरवात झाली. एकीकडे पाऊस गायब व दुसरीकडे कडक ऊन यामुळे पिके आता करपू लागली आहे. उशिरा पेरणी झालेल्या पिकांना पाऊस नसल्याचा मोठा फटका बसू लागला आहे. पिके करपू लागली असून ऊस लागवडही ठप्प झाली आहे.

दुष्काळी माण, खटाव, फलटण, कोरेगाव या तालुक्यांत सुरवातीच्या काळातच कमी पाऊस झाला होता. यामुळे पिकांच्या वाढीवरही काहीसा परिणाम झाला होता. सध्या पावसाचे होत असलेले मोजमाप ही चुकीचे ठरत आहे. एकाच तालुक्यात भिन्न भिन्न स्थिती असल्याने एका भागात जास्त तर एका भागात कमी असे असतानाही तालुक्याचा सरासरी पाऊस मोजला जातो. या मोजमापाचा शेतकऱ्यांना फटका बसत आहे.

महाबळेश्वर, पाटण, जावली, सातारा या तालुक्यांत ओला दुष्काळ जाहीर करण्याची मागणी झाली होती. मात्र सध्या पाऊस नसल्याने पाणीटंचाई जाणवू लागल्याने पिके हातची जाण्याची शक्यता निर्माण झाली आहे. ज्या शेतकऱ्यांकडे पाणी देण्याची सुविधा उपलब्ध आहे, असे शेतकरी पिकांना पाणी देऊन जगवण्याचा प्रयत्न करीत आहे. पावसाने अशीच दडी मारल्यास हाताला तोंडाला आलेले पीक जाणार असल्याचे शेतकरी सांगत आहेत.