देशाचा धरणसाठा 69 टक्‍क्‍यांपर्यंत

नवी दिल्ली : देशातील 91 प्रमुख जलाशयांमध्ये 2 नोव्हेंबरअखेर एकूण क्षमतेच्या सरासरी 69 टक्‍क्‍यांपर्यंत पाणीसाठा होता, असे केंद्रीय जल आयोगाने (सीडब्ल्यूसी) सांगितले. 26 ऑक्‍टोबरपर्यंत या पाणीसाठ्याचे प्रमाण 70 टक्के होते. तुलनेत नोव्हेंबरच्या पहिल्या आठवड्यात 1 टक्‍क्‍याने घट झाली आहे.

"सीडब्ल्यूसी'द्वारा देशातील प्रमुख धरणसाठ्यांचा साप्ताहिक आढावा घेतला जातो. 2 नोव्हेंबरअखेर 91 प्रमुख जलाशयांत सरासरी 108.372 अब्ज घनमीटर (बीसीएम) पाणीसाठा होता. या धरणांची एकूण पाणीसाठवण क्षमता 157.799 अब्ज घनमीटर आहे. देशाचे एकूण अंदाजित पाणीसाठ्याचे प्रमाण 252.388 अब्ज घनमीटर आहे. त्यानुसार या जलसाठ्यांची क्षमता 62 टक्के आहे. क्षेत्रनिहाय पाणीसाठ्याची स्थिती ः

उत्तर भारत उत्तर भारतातील हिमाचल प्रदेश, पंजाब आणि राजस्थान या राज्यांतील 6 मोठ्या जलाशयांची एकूण क्षमता 18.01 अब्ज घनमीटर आहे. सध्या येथे 13.14 अब्ज घनमीटर साठा आहे. एकूण क्षमतेच्या हे प्रमाण 73 टक्के आहे. गतवर्षी या काळात हेच प्रमाण 67 टक्के होते.

पूर्व भारत पूर्व भारतात झारखंड, ओडिशा, पश्‍चिम बंगाल आणि त्रिपुरा या राज्यांतील 15 धरणांची क्षमता 18.83 अब्ज घनमीटर आहे. येथील एकूण क्षमतेपैकी सध्या 14.81 म्हणजे 79 टक्के क्षमतेइतका पाणीसाठा आहे. गतवर्षी हे प्रमाण 84 टक्के होते.

पश्‍चिम भारत पश्‍चिम भारतातील महाराष्ट्र व गुजरातसह इतर राज्यांमध्ये मिळून 27 धरणे आहेत. यामध्ये आतापर्यंत एकूण 20.57 अब्ज घनमीटर पाणीसाठा आहे. त्यांची 27.07 अब्ज घनमीटर क्षमता लक्षात घेतल्यास हे प्रमाण 76 टक्के आहे. गतवर्षी हेच प्रमाण 84 टक्के होते.

मध्य भारत मध्य भारतातील उत्तर प्रदेश, उत्तराखंड, मध्य प्रदेश आणि छत्तीसगडमध्ये एकूण 12 जलाशयांचा समावेश होतो. त्यांची एकूण क्षमता 42.30 अब्ज घनमीटर पाणीसाठा आहे. सध्या येथे 26.11 अब्ज घनमीटर पाणीसाठा उपलब्ध असून, एकूण क्षमतेच्या 62 टक्के प्रमाण आहे. गतवर्षी हेच प्रमाण 89 टक्के होते.

दक्षिण भारत दक्षिण भारतातील आंध्र प्रदेश, तेलंगण, कर्नाटक, केरळ आणि तमिळनाडूत एकूण 31 जलाशयांचा समावेश होतो. त्यांची एकूण क्षमता 51.59 अब्ज घनमीटर पाणीसाठा आहे. सध्या येथे 33.75 अब्ज घनमीटर पाणीसाठा उपलब्ध असून, एकूण क्षमतेच्या 65 टक्के प्रमाण आहे. गतवर्षी हेच प्रमाण 47 टक्के होते.