अंबाजोगाईत ११ ऑक्टोबरला सीताफळ महोत्सव

औरंगाबाद  : मराठवाड्यातील अंबाजोगाईस्थीत सीताफळ संशोधन केंद्रात येत्या बुधवारी (ता. ११) सीताफळ महोत्सवासह शेतकरी मेळाव्याचे आयोजन करण्यात आले आहे. कृषी विभाग, वसंतराव नाईक मराठवाडा कृषी विद्यापीठ परभणी व सीताफळ संशोधन केंद्र, अंबाजोगाई यांनी यासाठी पुढाकार घेतला आहे.

या महोत्सवाच्या माध्यमातून आपल्या भागातील वाणांचा प्रदर्शनात सहभाग नोंदविण्याची संधीही सीताफळ उत्पादक शेतकऱ्यांना असणार आहे. बीड जिल्ह्यातील अंबाजोगाई येथे १९९७ साली पहिल्यांदा सीताफळ संशोधन केंद्राला मंजुरी मिळाल्यानंतर ते संशोधन केंद्र २००० साली कार्यान्वित झाले.

या केंद्राच्या माध्यमातून कार्यान्विततेच्या जवळपास सतरा वर्षांत पहिल्यांदाच अशाप्रकारे महोत्सव व शेतकरी मेळाव्याच्या आयोजनासाठी पुढाकार घेतला गेला आहे. या महोत्सवाच्या माध्यमातून मराठवाड्यासह राज्याच्या विविध भागांत उत्पादित होणाऱ्या व आपली गुणवैशिष्ट्ये जपून असलेल्या सीताफळाच्या वाणांचे प्रदर्शनही भरविण्यात येणार आहे. 

प्रदर्शनात सहभागी होणाऱ्या सीताफळ वाणांची निकोप स्पर्धा ठेवून त्यांना पारितोषिकाने सन्मानितही करण्यात येणार आहे. या महोत्सवानिमित्त आयोजित शेतकरी मेळाव्यात वसंतराव नाईक मराठवाडा कृषी विद्यापीठाचे कुलगुरू डॉ. बी. व्यंकटेश्वरलू मार्गदर्शन करणार आहेत. तसेच सीताफळाची आधुनिक पद्धतीने लागवड, उत्पादन तंत्रज्ञान, मार्केटिंग व प्रक्रिया उद्योग आदी विषयावर शेतकऱ्यांना मार्गदर्शन मिळणार आहे.

राज्याच्या कानाकोपऱ्यातून आपले विशेषत्व जपून असलेले सीताफळाचे वाण प्रदर्शनात सहभागी होणे अपेक्षित आहे. त्या वाणांच्या गुणात्मक संशोधनात मोठा हातभार लागेल, असे सीताफळ संशोधन केंद्राचे प्रभारी अधिकारी डॉ. गोविंद मुंडे म्हणाले.

औरंगाबादेतही सीताफळ महोत्सव औरंगाबाद शहरातही येत्या १३ ते १५ ऑक्‍टोबरदरम्यान सीताफळ महोत्सवाचे आयोजन करण्यात आले आहे. औरंगाबाद शहरातील कलाग्राममध्ये या महोत्सवाचे आयोजन करण्यात येणार आहे.

मराठवाड्यातील सीताफळाची लागवड वाढावी, सीताफळाच्या प्रक्रियेत नवउद्योजकांनी उतरावे, तंत्रज्ञान लोकांपर्यंत पोचावे, या उद्देशाने वसंतराव नाईक मराठवाडा कृषी विद्यापीठ, महाराष्ट्र पर्यटन विकास महामंडळ, कृषी विभाग औरंगाबाद विभागीय आयुक्‍तालयाच्या समन्वयातून या सीताफळ महोत्सवाचे आयोजन करण्यात येणार आहे.या संदर्भात नुकतीच बैठक पार पडल्याची माहिती हिमायतबाग फळ संशोधन केंद्राचे शास्त्रज्ञ डॉ. संजय पाटील यांनी दिली.