मराठवाड्यातील ३२ मध्यम प्रकल्पांतील उपयुक्त पाणीसाठा संपुष्टात

औरंगाबाद  : मराठवाड्यातील ३२ मध्यम प्रकल्पांत उपयुक्‍त पाणीसाठा शिल्लक नाही. सध्या मोठे, मध्यम, लघू व नद्यांवरील बंधारे मिळून असलेल्या ८६४ प्रकल्पांत केवळ ११.४८ टक्‍के उपयुक्‍त पाणीसाठा शिल्लक आहे.

औरंगाबाद जिल्ह्यातील जायकवाडी प्रकल्प अनेक वर्षांनंतर यंदा प्रथमच तुडूंब झाला होता. गत पावसाळ्याअखेर तुडूंब झालेल्या जायकवाडी प्रकल्पातील उपयुक्‍त पाणीसाठा आजघडीला २३ टक्‍क्‍यांवर आला आहे. दुसरीकडे अकरा मोठ्या प्रकल्पांपैकी येलदरी, सिद्धेश्‍वर, ऊर्ध्व पेनगंगा व सिनाकोळेगाव या मोठ्या प्रकल्पांमध्ये उपयुक्‍त पाणीसाठा शिल्लक नसल्याची स्थिती आहे.

मराठवाड्यातील ११ मोठ्या प्रकल्पांत १२.१२, मध्यम प्रकल्पात ११.२४, लघु प्रकल्पात ७.६९, गोदावरी नदीवरील ११ बंधाऱ्यांमध्ये २२.२० तर तेरणा, मांजरा, रेणा नदीवरील बंधाऱ्यांमध्ये केवळ २१. ३६ टक्‍केच उपयुक्‍त पाणीसाठा शिल्लक असल्याची माहिती जलसंपदा विभागाच्या सूत्रांनी दिली.  

सुरवात चांगली करणाऱ्या पावसाने नंतर मात्र दडी मारल्याने पाणीटंचाईचे ढग गडद होत असल्याचे चित्र आहे. शिवाय पाऊस असाच दडी मारून बसल्यास पेरणी झालेल्या क्षेत्रावरील पिकांना पाण्याअभावी फटका बसण्याची शक्‍यता नाकारता येत नाही.

औरंगाबाद जिल्ह्यातील सोळा मध्यम प्रकल्पांत केवळ १ टक्‍का उपयुक्‍त पाणीसाठा शिल्लक आहे. जालना जिल्ह्यातील ७ मध्यम प्रकल्पांत १०, बीडमधील १६ प्रकल्पांत १५, लातूरमधील ८ प्रकल्पांत १७,उस्मानाबादमधील १७ प्रकल्पांत १७, नांदेड जिल्ह्यातील ९ प्रकल्पांत १४ तर परभणी जिल्ह्यातील २ मध्यम प्रकल्पात केवळ ३ टक्‍केच उपयुक्‍त पाणीसाठा शिल्लक आहे.

मराठवाड्यातील ७४३ लघू प्रकल्पांपैकी २८४ लघु प्रकल्पांतील पाणीसाठ्याची स्थिती चिंताजनक आहे. यामध्ये औरंगाबाद, जालना, बीड, लातूर, परभणी व हिंगोली जिल्ह्यातील लघू प्रकल्पांचा समावेश आहे. औरंगाबाद जिल्ह्यातील ९० लघू प्रकल्पांत केवळ ४ टक्‍के उपयुक्‍त पाणीसाठा शिल्लक आहे. जालना जिल्ह्यातील ५७ प्रकल्पांत २, बीडमधील १२६ प्रकल्पांत ४, लातूरमधील १३२ प्रकल्पांत ८, परभणीमधील २२ प्रकल्पांत ५ तर हिंगोली जिल्ह्यातील २७ लघू प्रकल्पांत केवळ ४ टक्‍के उपयुक्‍त पाणीसाठा शिल्लक असल्याची माहिती जलसंपदा विभागाच्या सूत्रांनी दिली.