औरंगाबाद : मराठवाड्यातील ८६७ मोठ्या, मध्यम, लघुप्रकल्पांसह बंधाऱ्यांतील उपयुक्त पाणीसाठा १२.४१ टक्‍क्‍यांवर आला आहे. गत आठवड्याच्या तुलनेत एकूण पाणीसाठ्यात सुधारणा दिसत असली तरी ११ मोठ्या प्रकल्पांतील एकूण पाणीसाठ्यात किंचत घट नोंदली गेली आहे. २९ मध्यम प्रकल्पांतील उपयुक्त साठा संपुष्टात आला असून, जालन्यातील धामना प्रकल्प कोरडाठाक पडल्याचे जलसंपदा विभागाच्या अहवालातून स्पष्ट होते.
मराठवाड्यातील ११ मोठ्या प्रकल्पांचा उपयुक्त पाणीसाठा गत आठवड्याच्या तुलनेत किंचीत घटून १२.०७ टक्‍क्‍यांवर आला आहे. गत आठवड्यात मोठ्या ११ प्रकल्पांतील उपयुक्त पाणीसाठा १२.१२ टक्के होता. गत पावसाळ्यात तुडुंब झालेल्या जायकवाडी प्रकल्पातील उपयुक्त पाणीसाठा २१ टक्‍क्‍यांवर आला आहे. येलदरी, सिद्धेश्‍वर व सिनाकोळेगाव या मोठ्या प्रकल्पांत अजूनही उपयुक्त पाणीसाठा झालेला नाही. माजलगाव प्रकल्प एक टक्‍क्‍यावर, तर मांजरा प्रकल्प ७ टक्‍क्‍यांवर आला आहे.
मराठवाड्यातील ७५ मध्यम प्रकल्पांत गत आठवड्यात ११.५८ टक्के असलेला उपयुक्त पाणीसाठा २९ जुनअखेर १४.०७ टक्‍क्‍यांवर तर ७४६ लघुप्रकल्पांत ८.८४ टक्के असलेला उपयुक्त पाणीसाठा ९.९२ टक्‍क्‍यांवर गेला आहे. गोदावरी नदीवरी नदीवरील ११ बंधाऱ्यांमध्ये गत आठवड्यात २१.५१ टक्के असलेला उपयुक्त पाणीसाठा २५.४९ टक्‍क्‍यांवर आला आहे.
दुसरीकडे तेरणा, मांजरा, रेणा आदी नद्यांवरील २४ बंधाऱ्यांमध्ये गत आठवड्यात २२.५१ टक्के असलेला उपयुक्त पाणीसाठा ३०.४३ टक्‍क्‍यांवर आला आहे. औरंगाबाद जिल्ह्यातील १६ मध्यम प्रकल्पांत २, जालना जिल्ह्यातील ७ मध्यम प्रकल्पात ९, परभणीमधील २ मध्यम प्रकल्पांत ४ टक्‍केच उपयुक्त पाणीसाठा आहे.
लघुप्रकल्पांमध्ये औरंगाबाद जिल्ह्यातील ९३ प्रकल्पांत ४, जालन्यातील ५७ प्रकल्पांत २, बीडमधील १२६ प्रकल्पांत ९, लातूरमधील १३२ प्रकल्पांत ८ तर परभणीतील २२ प्रकल्पांत केवळ ४ टक्‍केच उपयुक्त पाणीसाठा शिल्लक आहे. उस्मानाबाद जिल्ह्यातील २०१ प्रकल्पांत १४, नांदेडमधील ८८ प्रकल्पांत १५ तर हिंगोली जिल्ह्यातील २७ लघुप्रकल्पांत २७ टक्के उपयुक्त पाणीसाठा शिल्लक आहे.
मराठवाड्यातील ७५ मध्यम प्रकल्पांपैकी २९ मध्यम प्रकल्पांतील उपयुक्त पाणीसाठा संपुष्टात आला आहे. त्यामध्ये औरंगाबाद जिल्ह्यातील १३, जालन्यातील १, बीडमधील ६, लातूरमधील ३, उस्मानाबादमधील २, नांदेडमधील २ तर परभणी जिल्ह्यातील एका प्रकल्पाचा समावेश आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.