साताऱ्यातील धरणांमध्ये २१ टक्के उपयुक्त पाणीसाठा

सातारा  : जिल्ह्यातील प्रमुख धरणांत जून महिन्याचा दुष्टीने समाधानकारक पाणीसाठा उपलब्ध आहे. जिल्ह्यातील प्रमुख सहा धरणांची एकूण क्षमता १४८.७४ टीएमसी असून, सध्या या धरणांमध्ये ३२.५९४ टीएमसी म्हणजेच २१.९१ टक्के उपयुक्त पाणीसाठा शिल्लक आहे. गतवर्षीच्या तुलनेत तारळी धरणाचा अपवाद वगळता इतर सर्व धरणांत उपयुक्त पाणीसाठा अधिक आहे.

जिल्ह्यातील उरमोडी धरणाचा अपवाद वगळता इतर सर्व प्रमुख धरणांत केवळ १४ ते २२ टक्‍क्‍यांपर्यंत पाणीसाठा शिल्लक आहे. वीजनिमिर्तीच्या दुष्टीने महत्त्वाचे असलेल्या कोयना धरणात २२.९० टीएमसी उपयुक्त पाणीसाठा शिल्लक आहे. या धरणात २२.८७ टक्के पाणी शिल्लक आहे. कोयना वगळता उरमोडी धरणात सर्वाधिक पाणीसाठा शिल्लक आहे. सध्या या धरणात ४.४५ टीएमसी उपयुक्त पाणीसाठा उपलब्ध आहे.

कोयना, धोम, कण्हेर, उरमोडी व धोम-बलकवडी या धरणांत गतवर्षीच्या तुलनेत अधिक पाणीसाठा आहे. सध्या धोम धरणात १६.१७, कण्हेर धरणात १९.३३, उरमोडी धरणात ४६.१५, धोम-बलकवडी धरणात १४.४८ टक्के उपयुक्त पाणीसाठा शिल्लक आहे. तारळी धरणात मात्र गतवर्षीच्या तुलनेत कमी पाणी शिल्लक आहे. गतवर्षी दमदार पाऊस झाल्याने सर्व नद्या दुथडी भरून वाहिल्या होत्या. पाणीसाठा नियंत्रित राहण्यासाठी सर्वच धरणांतून पाणी सोडावे लागले होते. पाण्याचे योग्य नियोजन झाल्यामुळे तारळी वगळता सर्वच धरणात अधिक पाणीसाठा शिल्लक आहे.

सध्या पूर्वमोसमी पाऊस सुरू झाल्याने पाणीटंचाई कमी होण्यास मदत होत आहे. मॉन्सून वेळेत आल्यास धरणातील सध्याचे पाणी शिल्लक राहण्याबरोबरच पाणीसाठ्यात वाढ होणार आहे.