औरंगाबाद : मराठवाड्यातील ८६४ प्रकल्पांमध्ये केवळ ४७ टक्‍के उपयुक्त पाणीसाठा शिल्लक आहे. त्यामध्ये मोठ्या प्रकल्पांसह मध्यम, लघू व तेरणा, मांजरा, रेणा नद्यांवरील बंधाऱ्यांमध्ये ५० टक्‍क्‍यांपेक्षा कमी असलेला उपयुक्त पाणीसाठा चिंतेत भर घालणारा आहे.
मराठवाड्यातील ११ मोठ्या प्रकल्पांत जानेवारीच्या तिसऱ्या आठवड्याअखेर ४९ टक्‍के उपयुक्त पाणीसाठा शिल्लक आहे. त्यापाठोपाठ ७५ मध्यम प्रकल्पांत ४८, ७४३ लघू प्रकल्पांत ३५, तेरणा, मांजरा, रेणा नद्यांवरील २४ बंधाऱ्यांमध्ये ४५ टक्‍के उपयुक्त पाणीसाठा शिल्लक आहे. केवळ गोदावरी नदीवरील ११ बंधाऱ्यांत असलेल्या ५८ टक्‍क्‍यांवरील उपयुक्त पाणीसाठाच काय तो दिलासा देणारा आहे.
औरंगाबाद जिल्ह्यातील १६ मध्यम प्रकल्पांमधील पाणीसाठ्याची स्थिती कमालीची चिंताजनक असून, या प्रकल्पांपैकी आठ प्रकल्प कोरडेठाक पडले आहेत. या संपूर्ण प्रकल्पांमधील उपयुक्त पाणीसाठा दहा टक्‍क्‍यांवर आला आहे. जानेवारी २०१७ मध्ये मराठवाड्यातील ७५ मध्यम प्रकल्पांत ६३ टक्‍के उपयुक्त पाणीसाठा शिल्लक होता.
मोठ्या ११ प्रकल्पांपैकी ४ प्रकल्पांत ७५ टक्‍क्‍यांपेक्षा जास्त उपयुक्त पाणीसाठा शिल्लक आहे. दुसरीकडे ३ प्रकल्पांत ५० ते ७५, तर २ मोठ्या प्रकल्पांत २५ टक्‍क्‍यांपेक्षा कमी उपयुक्त पाणीसाठा शिल्लक आहे.
मराठवाड्यातील ७४३ लघू प्रकल्पांपैकी ३०३ लघू प्रकल्पांत २५ टक्‍क्‍यांपेक्षा कमी उपयुक्त पाणीसाठा शिल्लक आहे. केवळ ८५ प्रकल्पांमध्येच ७५ टक्‍क्‍यांपेक्षा जास्त आहे. जानेवारी २०१७ मध्ये मराठवाड्यातील लघू प्रकल्पांमध्ये ५५ टक्‍के उपयुक्त पाणीसाठा शिल्लक होता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.