दूध भेसळ प्रतिबंधक योजना सक्रिय करा : गुलाबराव डेरे

नगर : राज्यात दूध व्यवसाय मोडकळीस येत आहे. राज्यातील टोन्ड दूध अनैसर्गिक आहे. अशा दुधामुळे पन्नास टक्के ग्राहक कमी झालेले आहेत. सरकारने दूध व्यवसायाला ऊर्जितावस्था आणण्यासाठी प्रयत्न करण्याची गरज आहे. लोकांना दुधाबाबत विश्‍वास निर्माण करण्यासाठी भेसळ प्रतिबंधक उपाययोजना सक्रिय कराव्यात आणि दूध पावडरीची निर्यात सुरू करावी, अशी मागणी कल्याणकारी दूध उत्पादक संघाचे अध्यक्ष गुलाबराव डेरे यांनी मुख्यमंत्री देवेंद्र फडणवीस यांच्याकडे केली आहे.

श्री. डेरे यांनी निवेदनात म्हटले आहे, की राज्यातील लोकसंख्येचा विचार करता सुमारे साडेचार कोटी लिटर दुधाची गरज आहे. मात्र, सध्या केवळ २ कोटी लिटर दुधाची निर्मिती होत आहे. बाहेरील राज्यातून ३० लाख लिटर दूध येते. तरीही दूध जास्तीचे झाले आहे. याचा अर्थ लोकांनी दुधाचे सेवन बंद केले आहे. जवळपास ५० टक्के लोकांनी दुधाकडे दुर्लक्ष केले आहे. राज्यात टोन्ड दूध अनैसर्गिक आहे. अशा दुधामुळे पन्नास टक्के ग्राहक कमी झाले आहेत.

राज्यात सध्या कर्नाटकातून जवळपास २५ लाख लिटर, तर गुजरातमधून पाच लाख लिटर दूध येते. राज्यातील दूध उत्पादकांचे हाल सुरू असताना परराज्यातील दूध संस्था मात्र येथे लूट करत आहेत. त्याला आवर घालण्यासाठी परराज्यातून येणाऱ्या दुधाला कर लावावा. शासनाची दूध खरेदी २७ रुपये लिटर असताना हेच दूध ग्राहकाला ४० ते ५० रुपये लिटरने विकले जाते. विविध योजनांमधून दुभत्या गायींचे वाटप करता; मग दुधाला दर कोण देणार, असा प्रश्‍न गुलाबराव डेरे यांनी उपस्थित केला आहे.

गुलाबराव डेरे म्हणाले, की राज्यात वेगवेगळ्या ब्रॅंडने दूध विक्री होते. सध्या जवळपास साडेतीनशे दुधाच्या ब्रॅंडची स्पर्धा चालू आहे. त्यातून चांगल्या प्रतीचे दूध मिळेलच याची खात्री नसते. लोकांमध्ये दुधाबाबत विश्‍वास राहिला नाही. प्रत्येक ब्रॅंडच्या दुधाची किंमत वेगळी आहे. लोकांचा विश्‍वास संपादन करण्यासाठी ब्रॅंडची संख्या कमी करावी.