कपाशी नुकसान सर्वेक्षण मागणीसाठी रास्ता रोको

यवतमाळ : बोंडअळीमुळे कपाशीच्या झालेल्या नुकसानाच्या पार्श्‍वभूमीवर तत्काळ सर्वेक्षणाचे आदेश देत नुकसानभरपाई मिळावी, या मागणीकरिता मनीष जाधव यांच्या नेतृत्वात सोमवारी (ता. १३) महागाव येथे रास्ता रोको करण्यात आला. तब्बल तीन तास चाललेल्या या आंदोलनानंतर तहसीलदार शेलार यांनी आंदोलनस्थळी येत निवेदन स्वीकारले.

महागाव तालुक्‍यासह यवतमाळ जिल्ह्यात कपाशीवरील बोंडअळीमुळे यावर्षीच्या हंगामात हे पीकच हातचे गेले आहे. उत्पादकता खर्चाची भरपाईदेखील शक्‍य नसल्याने शेतकऱ्यांकडून पीक सर्वेक्षण व भरपाईची मागणी होत आहे. महागाव तालुक्‍यातील पिकाची आमदार राजेंद्र नजरधने यांनी पाहणी केली. त्यासोबतच पालकमंत्री मदन येरावार यांनीदेखील मुख्यमंत्र्यांकडे शेतकऱ्यांना मदत मिळावी, असा प्रस्ताव दिला होता. अद्याप मदतीसंदर्भाने शासन स्तरावरून कोणताच निर्णय झालेला नाही. परिणामी शेतकऱ्यांनी संघटित होत सोमवारी या विरोधात रास्ता रोको केला.

मनीष जाधव, गजानन कांबळे, पंचायत समिती सभापती प्रमोद जाधव, नागोराव कदम, लखन देवकते, डॉ. अरुण पाटील, गणेश तोंडकर, राम देवकते, रामेश्‍वर पवार यांच्यासह मोठ्या संख्येने शेतकरी आंदोलनात सहभागी झाले होते. तब्बल तीन तास हे आंदोलन चालले. याची दखल घेत तहसीलदार शेलार यांनी घटनास्थळी पोचत निवेदन स्वीकारले.

‘कापूस संशोधन संस्थेचा अहवाल द्या’ केंद्रीय कापूस संशोधन संस्थेने या भागातील पिकाची पाहणी केली. परंतु त्या संदर्भाने अहवाल गेल्या महिनाभरापासून देण्यात आला नाही. बोंडअळीचा प्रादुर्भाव होण्यामागील कारणांचा हा अहवाल लवकर दिला जावा, अशी मागणीदेखील शेतकऱ्यांनी केली.