तूर, हरभऱ्यासाठी बाजारभाव, हमीभावातील फरक द्या : धनंजय मुंडे

धनंजय मुंडे
धनंजय मुंडे

मुंबई : राज्यात खरेदी न झालेल्या आणि फक्त नोंदणी झालेल्या तूर, हरभऱ्यासाठी प्रतिक्विंटल १ हजार रुपये अनुदान देण्याची घोषणा शासनाने केली आहे. ही घोषणा फसवी असून, त्याऐवजी शासकीय खरेदी न झालेल्या शेतकऱ्यांकडील तूर, हरभऱ्यासाठी बाजारभाव व हमीभावातील फरकाची रक्कम शासनाने द्यावी, अशी मागणी विरोधी पक्षनेते धनंजय मुंडे यांनी केली आहे.

राज्यातील हजारो शेतकऱ्यांचा लाखो क्विंटल हरभरा, तूर नोंदणी करूनही खरेदी अभावी पडून आहे. त्यामुळे राज्यातील शेवटच्या शेतकऱ्याचा हरभरा, तूर खरेदी होईपर्यंत खरेदी केंद्र सुरू ठेवावीत व या योजनेला मुदतवाढ द्यावी, अशी मागणी विरोधी पक्षनेते धनंजय मुंडे यांनी मुख्यमंत्र्यांकडे केली होती. मंगळवारी शासनाने हरभरा खरेदीस १३ जूनपर्यंत मुदतवाढ देण्याचे जाहीर केले.

याबाबत श्री. मुंडे म्हणाले, की शासनाने १३ जूनपर्यंत मुदतवाढ दिली असली तरी या कालावधीत शेतकऱ्यांकडील संपूर्ण हरभरा खरेदी व्हावी यासाठी बारदाना, गोदामे आदींची व्यवस्था करावी. तूर व हरभरा उत्पादकांना प्रतिक्विंटल एक हजार रुपये अनुदान देण्याची शासनाने घोषणा केली असली तरी ही घोषणा ही शेतकऱ्यांची फसवणूक करणारी आहे. बाजारात हरभऱ्याला केवळ तीन हजार तर तुरीसाठी चार हजार रुपये भाव मिळत आहे. शासकीय हमीभाव मात्र ४४०० व ५४५० रुपये क्विंटल असल्याने शेतकऱ्यांचे एका क्विंटल मागे १५०० रूपये नुकसान होणार असताना, शासनाने केवळ एक हजार रुपये ते ही केवळ एका क्विंटलपर्यंतच्या मर्यादेत देण्याची घोषणा करून शेतकऱ्यांची फसवणूक केली आहे.

त्याऐवजी शासनाने मध्य प्रदेश सरकारच्या धर्तीवर भावांतर योजना सुरू करून बाजारभाव व हमीभाव यातील फरकाची रक्कम शेतकऱ्यांना अनुदान स्वरूपात द्यावी अशी मागणी आहे. शासन खरेदीचे विक्रमी आकडे सांगत असले तरी मागील तीन ते चार वर्षांत शेतीमालाच्या चुकीच्या आयात धोरणामुळे सातत्याने शेतीमालाचे बाजारभाव कोसळत असल्याने शासकीय खरेदी, विक्री अनिवार्य झाली आहे. त्यामुळेच शासनाने केलेल्या खरेदीचे आकडे मोठे दिसत असले तरी प्रत्यक्षात उत्पन्नाच्या तुलनेत ३० टक्केसुद्धा खरेदी झाली नसल्याचा दावा त्यांनी केला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com