गणेशोत्सव, गौरी पूजनासाठी फुलांना मागणी वाढली

फुल खरेदीसाठी बाजारात गर्दी
फुल खरेदीसाठी बाजारात गर्दी

पुणे  ः गणेशाेत्सवादरम्यान पूजा आणि सजावटीसाठीच्या विविध फुलांना मागणी वाढली आहे. विशेषतः शनिवारी (ता.१५) गौरींचे आगमन आणि रविवारी (ता.१६) गाैरी पूजनासाठी विविध शाेभिवंत फुलांना मागणी वाढली हाेती. यामुळे फुलांच्या खरेदीसाठी रविवारी (ता.१६) पुणे बाजार समितीमधील फुलबाजार ग्राहकांनी फुलला हाेता. पुणे शहरासह परराज्यांतून देखील फुलांना मागणी वाढली आहे.

गौरींच्या आगमनासाठी घरात सजावट केली जाते. यासाठी महिलांकडून विविध शाेभिवंत फुलांना मागणी असते. यामुळे गेल्या दोन दिवसांपासून फुलखरेदीसाठी बाजारात गर्दी होती. दुर्वा तसेच केवडा, कमळ या फुलांना ही विशेष भाव होता.विविध फुलांमध्ये झेंडू, गुलछडी, गुलछडी काडी, शेवंती या पूजेसाठी बराेबरच शाेभेसाठीच्या कार्नेशियन, ऑर्केड, डच गुलाब, जरबेरा, लिलियम बराेबरच ग्लॅडिओलस, स्प्रिंगलर, गोल्डन रॉड, ब्लू डेझी, फिशपाम, ड्रेसिना यासारख्या फिलर्सच्या प्रकारांना सजावटीसाठी विशेष मागणी वाढली हाेती. यामुळे फुलांच्या दरात ५० टक्क्यांपर्यंत वाढ झाली हाेती, असे आडते सागर भाेसले यांनी सांगितले.

तसेच गेल्या काही महिन्यांपासून झेंडूच्या फुलांची मोठी आवक होत असून, उठाव नसल्याने माल पडून राहत आहे. गेल्या वर्षी याच दरम्यान झेंडूला एका किलाेला १५० रुपयांपर्यंत रुपये दर होता. आता हा एका किलोसाठी २० रुपयांपर्यंत खाली आला आहे. गुलछडी काडीला शनिवारी (ता.१५) प्रती किलाेला ३०० ते ५०० रुपयांवर असलेला दर ३०० रुपयांपर्यंत कमी झाल्याचेही भाेसले यांनी सांगितले.  

पुणे बाजारात झेंडूची माेठ्याप्रमाणावर आवक झाल्यामुळे अनेक खरेदीदारांनी कमी दरात ही फुले खरेदी करून दिल्लीला पाठवली. दिल्ली मध्ये सध्या झेंडूला ८० रुपयांपर्यंत दर मिळत असून, विमान वाहतुकीचा खर्च प्रति किलाेला ३० रुपयांपर्यंत आहे. तसेच गोवा, सुरत, अहमदाबाद येथे देखील फुले पाठविण्याचे प्रमाण वाढले असल्याचे श्री. भाेसले यांनी सांगितले. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com