सोलापूरच्या शेतकऱ्याची सांगलीत डाळिंबाची थेट विक्री

सांगली : डाळिंब घ्या... डाळिंब, शंभर रुपयाला चार किलो... अशी आरोळी ध्वनिक्षेपकावरून कानावर पडत होती. ग्राहकांची डाळिंब खरेदीसाठी झुंबड उडली होती. ठिकाण होते, शहरातील स्टेशन चौक. कोळा (ता. सांगोला) येथील डाळिंब उत्पादक शेतकरी शंकर सरगर सांगली आणि कोल्हापूर येथील आठवडा बाजारात पाच टनाची डाळिंबाची विक्री करतात. थेट विक्रीचा मार्ग निवडल्याने या ठिकाणी डाळिंबाचा समाधानकारक दर मिळतोय, अशी त्यांची भावना आहे.   सांगलीतील बाजार समितीत डाळिंबाची विक्री करण्यासाठी सरगर आले होते. मात्र दर मिळाला नाही. सरगर म्हणाले, ‘‘ ‘दीड टन डाळिंबानं गाडीत भरून सकाळी आठ वाजता सांगलीत आलो. बाजार समितीत सौदे सुरू झाले. मात्र अपेक्षित दर मिळाला नाही. त्यामुळे थेट सांगलीच्या मुख्य चौकात गाडी उभी केली. दुपारपर्यंत एक टन डाळिंबाची विक्री झाली. चार दिवसांपासून येथे डाळिंब विक्रीसाठी येतोय. ग्राहकांची खरेदीसाठी गर्दी होते.``