बाजार समिती निवडणुकीत देवस्थान प्रतिनिधीला मतदानाचा अधिकार?

पुणे ः ग्रामीण महाराष्ट्रातील महत्त्वाचे आर्थिक सत्ता केंद्र असलेल्या बाजार समित्यांच्या निवडणुकीत शेतकऱ्यांना थेट मतदानाचा अधिकार देत असताना, आता सातबारा उताऱ्यावरील देवस्थानांच्या प्रतिनिधीबराेबरच एकत्रित सातबारा उताऱ्यावरील ज्येष्ठतेनुसार मतदानाचा अधिकार देण्याचा शासन विचार करीत आहे. अशी माहिती सहकार व पणनमंत्री सुभाष देशमुख यांनी दिली. तर तुरुंगावास झालेल्यांना निवडणूक लढविता येणार नसल्याचादेखील नियम करण्यात येणार आहे.

राज्यातील बाजार समित्यांच्या निवडणुकांमध्ये थेट शेतकऱ्यांना मतदानाचा अधिकार देण्याचा निर्णय राज्य शासनाने घेतला. यामध्ये १० गुंठे क्षेत्र असलेल्या सर्व सातबारा उताराधारक शेतकऱ्यांना मतदानाचा हक्क बजावता येणार आहे. तर पुढील टप्प्यात सातबारा उताऱ्यावर नावे आणि पाच वर्षांत किमान तीन वेळा संबंधित बाजार समितीमध्ये शेतमालाची विक्री केलेल्या शेतकऱ्यांचा समावेश करण्यात येणार आहे.

मात्र या नियमांमुळे मतदार यादी करताना अनेक क्लिष्टता येत असल्याचे समाेर आले आहे. यामध्ये देवस्थांनांच्या नावेदेखील सातबारा उतारे असून, त्या उताऱ्यांवर ट्रस्टींची नावे आहेत. यामुळे या ट्रस्टींपैकी एका प्रतिनिधीला अधिकार देण्याचा सरकार विचार करीत आहे, असे मंत्री देशमुख यांनी सांगितले.

तसेच १० गुंठ्यांच्या एका सातबारा उताऱ्यावर एकत्रित कुटुंबीयांची नावे असतात, अशा वेळी यामधील कुटुंबातील ज्येष्ठ व्यक्तीला मतदानाचा अधिकार देता येईल का, असा देखील विचार शासन करीत आहे, असेही देशमुख यांनी सांगितले. तर या निवडणुकांमध्ये गुन्हे दाखल असलेल्या शिक्षा झालेल्या व्यक्तीला निवडणूक लढविता येणार नसल्याचेदेखील पणन विभागाने स्पष्ट केले आहे.