कर्नाटक, तमिळनाडूमध्ये मॉन्सूनची प्रगती

पुणे  : नैॡत्य मोसमी वाऱ्यांनी (मॉन्सून) उत्तरेकडील वाटचाल सुरू ठेवत रविवारी दक्षिणअंतर्गत कर्नाटक आणि तमिळनाडूच्या आणखी काही भागांत प्रगती केली. तर ईशान्य भारतातील आसाम, अरुणाचल प्रदेश आणि त्रिपुराच्या काही भागांत मॉन्सून दाखल झाला आहे. पुढील वाटचालीस पोषक स्थिती असल्याने बुधवारपर्यंत (ता. ६) दक्षिण आणि ईशान्य भारताच्या आणखी काही भागांत मॉन्सून पोचणार असल्याचे हवामान विभागाने स्पष्ट केले आहे.  मॉन्सूनने यंदा नियोजित वेळेच्या तीन दिवस आगोदर (२९ मे) केरळात धडक दिली. अरबी समुद्रात आलेल्या कमी दाबाच्या क्षेत्रामुळे दुसऱ्याच दिवशी (३० मे) माॅन्सूनने कर्नाटक किनारपट्टीचा बराचसा भाग व्यापला. त्यानंतर मात्र तीन दिवस कर्नाटकात मॉन्सूनची स्थिती जैसे थे होती. रविवारी माॅन्सूनने प्रगती करत दक्षिणअंतर्गत कर्नाटकाचा काही भाग, तर तमिळनाडूचा बराचसा भाग व्यापला. दरम्यान बंगालच्या उपसागरावरून ईशान्य भारतातील राज्यांकडे वाटचाल सुरू होती. शुक्रवारी (ता.१) मणिपूर, मिझोराम राज्याच्या काही भागांत माॅन्सून पोचला होता. रविवारी मणिपूर, मिझोराम, नागालॅँडच्या उर्वरित भागासह त्रिपुरा, अरुणाचल प्रदेशपर्यंत धडक दिली आहे.  माॅन्सूनच्या पुढील वाटचालीस अनुकूल हवामान होत असल्याने बुधवारपर्यंतच्या तीन दिवसांमध्ये दक्षिणेकडील आणखी काही भागांत, तसेच संपूर्ण ईशान्य भारताचा भाग व्यापून पश्‍चिम बंगालपर्यंत दाखल होईल. तर बुधवारनंतर महाराष्ट्र आणि गोव्यात पावसाचे प्रमाण वाढून शुक्रवारपर्यंत (ता. ८) महाराष्ट्राच्या काही भागांत मॉन्सून दाखल होण्याची शक्यता हवामान विभागाने वर्तविली आहे.