ज्यांनी समृद्धी महामार्गाला विरोध केला, तेच दलाल झाले : मुख्यमंत्र्यांची टीका

नागपूर : ज्यांनी समृद्धी महामार्गाला विरोध केला, तेच दलाल झाले. एक टोळीच शेतकऱ्यांच्या नावावर काम करतेय, अशी टीका मुख्यमंत्री देवेंद्र फडणवीस यांनी येथे केली. सुयोग निवासस्थानी आज (ता. १९)  पत्रकारांशी वार्तालाप करताना मुख्यमंत्री फडणवीस बोलत होते. यावेळी त्यांनी विविध विषयांवर आपली मते मांडली.  कोकणातील रिफायनरी संदर्भात बोलताना मुख्यंमंत्री म्हणाले, की रिफायनरीसाठी आम्ही शिवसेनेसह आग्रह धरला. ही रिफायनरी ग्रीन रिफायनरी आहे. मात्र, आता अपप्रचार केला जातोय. याचा मासेमारी सोडा, समुद्रावर कुठलाही परिणाम होणार नाही. जी जागा निवडली, त्या जागेवर शेती होत नव्हती. 40 टक्के जागा गुंतवणूकदाराची आहे. मुंबईतील एनजीओ जाऊन आंदोलन करतात. आंदोलन करणे हा धंदा झालाय. या प्रकल्पामुळे एक लाख स्थानिक लोकांना रोजगार मिळणार आहे. नोकऱ्यात स्थानिकांना प्राधान्य देणार आहोत. आम्ही कंपनीला तीन वर्षे आधीच कौशल्य विकास कार्यक्रम राबविण्याचे सांगणार आहोत. तीन लाख कोटींची गुंतवणूक देशांत कुठेच नाही, हे जर हातून गेलं तर करंटेपणाच म्हणावा लागेल. रिफायनरी बनवा समितीही तयार झालीय. या विषयी आम्ही गावागावात जाऊन माहिती देणार आहोत. एकनाथ खडसे यांचे पुनर्वसनासंदर्भात बोलताना मुख्यमंत्री म्हणाले, ''नाथाभाऊंचे पुनर्वसन शक्य नाहीच. पुनर्वसन विस्थापितांचे होते. नाथाभाऊ प्रस्थापित नेते आहेत, अशी लोकं असेट असतात.'' नारायण राणे यांच्या मंत्रिमंडळ समावेशाबाबत बोलताना मुख्यमंत्री म्हणाले की, नारायण राणे यांचे पुनर्वसन होणार. ते आमच्यासोबत आहेत. राणेंना आमच्या कोट्यातून घेणार, त्यामुळे शिवसेनेच्या विरोधाचा प्रश्न नाही.

गुजरातमधील विजय अभूतपूर्व. देशाच्या राजकारणात विधानसभेत 50 टक्के मतं मिळवणारी सरकार कमी. गुजरात-हिमाचल मधील विजयामुळे महाराष्ट्रात आम्ही अजून स्थिर झालो, असा आत्मविश्वास त्यांनी व्यक्त केला.