अंबाजोगाई/परळी, जि. बीड : संत जगमित्र नागा सहकारी सूतगिरणीने बीड जिल्हा मध्यवर्ती सहकारी बॅंकेचे कर्ज थकविल्याप्रकरणी सूतगिरणीचे संचालक व विरोधी पक्षनेते धनंजय मुंडे यांच्यासह सात जणांची स्थावर मालमत्ता शासन संलग्न करण्याचा आदेश अंबाजोगाई येथील द्वितीय जिल्हा तथा अतिरिक्त सत्र न्यायाधीश धनंजय देशपांडे यांनी दिला. संलग्न करायच्या मालमत्तांत धनंजय मुंडे यांच्या शेतजमिनीसह परळी येथील घराचाही समावेश आहे. जगमित्र नागा सूतगिरणीला बीड जिल्हा बॅंकेने तीन कोटी रुपयांचे कर्ज दिले होते. त्याची वेळेत परतफेड न झाल्याने थकबाकी 13 कोटींच्या पुढे गेली आहे. त्यामुळे जिल्हा बॅंकेने मुंडे यांच्यासह सूतगिरणीच्या अन्य संचालकांवर गुन्हे दाखल केले होते. या प्रकरणात विशेष तपास पथकाच्या अहवालात हा निधी दुसरीकडेच वळवण्यात आल्याचा ठपका ठेवण्यात आला होता. या प्रकरणात कलमे वाढविल्यानंतर आरोपींच्या मालमत्ता शासन संलग्न करण्याच्या कारवाईसाठी राज्य सरकारने पोलिस अधीक्षकांना प्राधिक्रुत केले होते. त्यानुसार पोलिस अधीक्षक जी. श्रीधर यांनी अंबाजोगाई न्यायालयात संबंधीचांच्या मालमत्ता संलग्न करण्यासाठी अर्ज केला होता. त्यानुसार द्वितीय जिल्हा न्यायाधीश धनंजय देशपांडे यांनी धनंजय मुंडे, जीवराज ढाकणे, भीमराव लिंबाजी मुंडे, मीरा रुद्रकंठवार, सुधाकर पौळ, महादू सानप, गोदावरी राजाराम मुंडे यांच्या मालमत्ता शासन संलग्न करण्याचा आदेश नुकताच दिला आहे. या मालमत्तांवर बोजे चढविण्याची कारवाई जिल्हाधिकाऱ्यांनी करावी, असे निर्देशही न्यायालयाने दिले आहेत.
सूतगिरणीच्या सतरा संचालकांपैकी मी एक आहे. हा आदेश अंतिम नसून अंतरिम आहे. तो रद्द करण्यासाठी न्यायालयीन लढाई लढू. या प्रकरणात तपासाला कायम सहकार्य केले आहे. -धनंजय मुंडे, विधान परिषदेचे विरोधी पक्षनेते
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.