धुळे जिल्हा बॅंकेतर्फे ३३.५० कोटींचे कर्ज वितरण

धुळे : धुळे व नंदुरबार जिल्हा मध्यवर्ती सहकारी बॅंकेतर्फे पीककर्ज वाटप सुरू असून, आत्तापर्यंत ३३.५० कोटी रुपये कर्ज वितरित करण्यात आले आहे. कर्जवाटपात बॅंक जिल्ह्यात आघाडीवर आहे, अशी माहिती बॅंकेतर्फे देण्यात आली.  जिल्हा बॅंकेच्या २३ एप्रिलला झालेल्या संचालक मंडळाच्या सभेत "नाबार्ड''च्या धोरणाला अनुसरून रुपे किसान क्रेडिट कार्डअंतर्गत प्रत्यक्ष पीककर्ज वाटपाला सुरवात झाली आहे. रुपे किसान क्रेडिट कार्डअंतर्गत "एटीएम''मधून दररोज २० हजार रुपये काढता येऊ शकतात. तसेच खते, बी-बियाणे खरेदीसाठी रोजची मर्यादा २५ हजार रुपये अशी एकूण ४५ हजार रुपये दिवसाला मर्यादा आहे. रुपे किसान कार्ड सर्व बॅंकांच्या "एटीएम''मध्ये कार्यान्वित होऊ शकते. कागदपत्रांची उपलब्धता करून दिल्यानंतर पीककर्ज मर्यादा मंजूर केली जात आहे. जिल्हा बॅंकेच्या सर्व शाखांमार्फत २४ एप्रिल ते १० मे या पंधरवड्याअखेर ३३.५० कोटी रुपये कर्ज वितरित केले आहे. धुळे जिल्ह्यासाठी कर्जवाटप लक्ष्यांक १२५ कोटी, तर नंदुरबार जिल्ह्यासाठी ७१.२० कोटी एवढा आहे.  २०१७-१८ मध्ये उचल केलेल्या पीककर्जाची मार्च २०१८ व आजपर्यंत परतफेड केलेल्या सभासदांना नवीन वर्षासाठी पीककर्ज उपलब्ध करून देण्यात येत आहे. संस्था, सभासदांनी जिल्हा बॅंकेच्या शाखेत आवश्‍यक "केवायसी'' कागदपत्रांची पूर्तता करून दिल्यानंतर रुपे किसान क्रेडिट कार्ड तत्काळ उपलब्ध करून देण्यात येत आहे, अशी माहिती बॅंकेचे मुख्य कार्यकारी अधिकारी धीरज चौधरी यांनी दिली.