महसूल मंडळातील सरासरी उत्पादकतेनुसार तूर खरेदीचे निर्देश

परभणी : केंद्र शासनाच्या किंमत समर्थन योजनेअंतर्गत आधारभूत किंमत दराने शेतकऱ्यांकडून तूर खरेदी करण्यासाठी जिल्हानिहाय प्रतिहेक्टरी उत्पादकता निश्चित करून देण्यात आलेल्या मर्यादेत बदल करण्यात आले आहेत. कृषी विभागाकडून प्राप्त झालेल्या जिल्ह्यातील प्रत्येक महसूल मंडळातील उच्चतम उत्पादकतेच्या प्रयोगावर आधारित सरासरी उत्पादकतेनुसार शेतकऱ्यांकडून तूर खरेदी करण्यात यावी, अशी सूचना सोमवारी (ता. १२) रोजी मंत्रालयातून काढण्यात आलेल्या परिपत्रकाद्वारे राज्य सहकारी पणन महासंघ तसेच विदर्भ सहकारी पणन महासंघाच्या व्यवस्थापकीय संचालकांना देण्यात आल्या आहेत.  सुधारित सरासरी उत्पादकतेनुसार नांदेड जिल्ह्यातील शेतकऱ्यांकडून प्रतिहेक्टरी १०.७६ क्विंटल, परभणी जिल्ह्यात प्रतिहेक्टरी १९.४१ क्विंटल, हिंगोली जिल्ह्यात ६.०३ क्विंटल तूर खरेदीची मर्यादा ठरवून देण्यात आली आहे. किंमत समर्थन योजनेअंतर्गत आधारभूत किमतीने राज्यातील शेतकऱ्यांकडून तूर खरेदी करण्यासाठी ३१ जानेवारी रोजीच्या शासनाने परिपत्रक काढून जिल्हानिहाय प्रतिहेक्टरी उत्पादकतेची मर्यादा ठरवून दिल्यानंतर फेब्रुवारी महिन्यात राज्यात शासकीय तूर खरेदीस सुरवात झाली; परंतु पीककापणी प्रयोगाच्या निष्कर्षानंतर विविध जिल्ह्यांत महसूल मंडळ निहाय उत्पादकता बदलत असल्याचे आढळून आले. त्यामुळे कृषी विभागाकडून जिल्ह्यांतील महसूल मंडळातील उच्चतम उत्पादकतेचे प्रयोग गृहीत धरून प्राप्त झालेल्या सरासरी उत्पादकतेनुसार शेतकऱ्यांकडून तूर खरेदी करण्यात यावी, अशी सूचना सोमवारी (ता. १२) रोजी मंत्रालयातून काढण्यात आलेल्या परिपत्रकाद्वारे राज्य सहकारी पणन महासंघ, तसेच विदर्भ सहकारी पणन महासंघाच्या व्यवस्थापकीय संचालकांना देण्यात आल्या आहेत. जिल्हानिहाय सुधारित प्रतिहेक्टरी सरासरी तूर उत्पादकता आणि कंसात यापूर्वीची तूर उत्पादकता (क्विंटलमध्ये) ः औरंगाबाद ९.६२ (५.५०), जालना ११.३० (८.५०), बीड ७.१५ (६.५०), लातूर १६.०९ (१०), उस्मानाबाद १०.४५ (७), नांदेड १०.७६ (१२), परभणी  १९.४१ (७.५०), हिंगोली ६.०३ (७.५०), बुलडाणा ८.६८ (७.५०), अकोला ११.०८ (९), वाशीम ४.०२ (५), यवतमाळ १०.४३ (७), अमरावती १४.६३ (६), वर्धा ११.६९ (१२), नागपूर १४.०२ (१६.५०), भंडारा ३ (३), गोंदिया ६.५० (६.५०), चंद्रपूर २०.३८ (१०.५०), गडचिरोली ३.५० (३.५०), नाशिक १२.६८ (१०.५०), धुळे १२.४६ (१०.५०), नंदुरबार ८.०३ (६.५०), जळगाव ८.५१ (६), नगर ११.६१ (६.५०), पुणे ८.३९ (७), सोलापूर ८.३९ (५.५०), सातारा ५ (५), सांगली २.९१ (३.५०), कोल्हापूर ५ (८), ठाणे ६ (६), पालघर ५(५), रायगड ६.५० (६.५०), रत्नागिरी ४.५० (४.५०), सिंधुदुर्ग ४.५०( ४.५०).