व्यथांना वाट मोकळी.. मागण्यांची निश्चिती

औरंगाबाद ः येथील महसूल प्रबोधिनीमध्ये ''मराठवाड्यातील आत्महत्याग्रस्त कुटुंबांतील महिला शेतकऱ्यांचे प्रश्न'' या विषयावरील चर्चासत्राला सोमवारी (ता. २६) प्रारंभ झाला. मंगळवारीही (ता. २७) या चर्चासत्राच्या निमित्ताने घरातील कर्ता पुरुष गेल्यानंतर निर्माण झालेले प्रश्न व त्यांची सोडवणूक करताना येणाऱ्या अडचणी, त्यांची सोडवणूक करताना होणारी दमछाक यांना आत्महत्याग्रस्त कुटुंबांतील महिला शेतकऱ्यांनी वाट मोकळी करून देत आपल्या मागण्यांची निश्चिती केली. राज्य महिला आयोग आणि महिला किसान अधिकार मंच यांच्या संयुक्‍त विद्यमाने या चर्चासत्राचे आयोजन करण्यात आले. चर्चासत्राच्या पहिल्या दिवशी राज्य महिला आयोगाच्या अध्यक्षा विजया रहाटकर, विभागीय आयुक्‍त डॉ. पुरुषोत्तम भापकर, उपायुक्‍त वर्षा ठाकूर, एस. पी. सावरगावकर, तहसीलदार आम्रपाली कासोदेकर, जिल्हा महिला बालकल्याण अधिकारी तृप्ती ढेरे आदींची उपस्थिती होती. पहिल्या दिवशी चर्चासत्राची चार सत्रे पार पडली. यामध्ये चर्चासत्र आयोजनाची पार्श्वभूमी, मराठवाड्यातील शेतीवरचे अरिष्ट, शासनाची भूमिका, आत्महत्याग्रस्त भागातील महिलांच्या प्रश्नींची मांडणी, आत्महत्याग्रस्त कुटुंब ठरविण्याचे निकष, वारसा, नोंदी, कर्जाची उपलब्धता, उपजीविकेसंबंधीचे प्रश्न, सरकारी योजनांचा लाभ आदीवर चिंतन झाले. पहिल्या दिवशी आत्महत्याग्रस्त शेतकरी कुटुंबातील महिलांनी आपल्या व्यथा मांडल्या. विभागीय आयुक्‍त डॉ. पुरुषोत्तम भापकर यांनी, ‘‘प्रशासन आत्महत्याग्रस्त कुटुंबांपर्यंत पोचण्यात यशस्वी झाले नाही. त्यामुळे येत्या चार एप्रिलला पुन्हा अधिकारी प्रत्यक्ष आत्महत्या केलेल्या शेतकऱ्यांच्या कुटुंबांची भेट घेऊन त्यांचे प्रश्न सोडविण्यासाठी, त्यांना विविध विकासाच्या योजनांमध्ये सहभागी करून घेतील’’, असे स्पष्ट केले. याचवेळी चर्चेवर आधारीत आत्महत्याग्रस्त कुटुंबांतील शेतकरी महिलांच्या शासन प्रशासनदरबारी मागण्यांची निश्चिती करण्यात आली.  मंगळवारच्या पहिल्याच सत्रात औरंगाबादचे जिल्हाधिकारी नवल किशोर राम यांनी वारसा नोंदी, शेतीच्या योजनांचे लाभ याविषयी महिला शेतकऱ्यांना मार्गदर्शन केले. यावेळी उपायुक्‍त वर्षा ठाकूर, उस्मानाबादच्या उपविभागीय अधिकारी श्रीमती देशमुख आदींची उपस्थिती होती. आलेल्या संकटांना धैर्याने तोंड देण्याची गरज व्यक्‍त करून परावलंबी न राहता सक्षमपणे स्वत: प्रत्येक अडचणी व प्रश्नाच्या मुळाशी जाण्याचा प्रयत्न करण्याचे आवाहन उपायुक्‍त वर्षा ठाकूर यांनी केले. संचालन मकामच्या सीमा कुलकर्णी यांनी केले, तर मनीषा तोकले यांच्यासह इतरांनी या चर्चासत्रात सक्रिय सहभाग नोंदविला.  या मागण्यांची झाली निश्चिती...