शेतकऱ्यांना प्राधान्याने पीककर्ज वाटप करा ः रावते

जालना : शेतकऱ्यांना पीक लागवडीसाठी पैशांची आवश्‍यकता असून, अशा परिस्थितीमध्ये बॅंकांनी शेतकऱ्यांप्रती सकारात्मक दृष्टिकोन ठेऊन संवेदनशीलपणे काम करत शेतकऱ्यांना प्राधान्याने पीककर्जाचे वाटप करण्याचे निर्देश राज्याचे परिवहनमंत्री दिवाकर रावते यांनी दिले.

छत्रपती शिवाजी महाराज शेतकरी सन्मान योजनेसंदर्भात जिल्हाधिकारी कार्यालयाच्या सभागृहात गुरुवारी (ता. २८) आढावा बैठकीचे आयोजन करण्यात आले होते. त्या प्रसंगी श्री. रावते बोलत होते. बैठकीस जिल्हा परिषदेचे अध्यक्ष अनिरुद्ध खोतकर, आमदार नारायण कुचे, माजी आमदार संतोष सांबरे, भास्कर आंबेकर, जिल्हाधिकारी रवींद्र बिनवडे, निवासी उपजिल्हाधिकारी राजेश जोशी, जिल्हा उपनिबंधक एन .व्ही. आघाव, अग्रणी बॅंक अधिकारी श्री. इलमकर, जिल्हा अधीक्षक कृषी अधिकारी दशरथ तांभाळे, उपविभागीय अधिकारी केशव नेटके आदींची प्रमुख उपस्थिती होती.

मंत्री श्री. रावते म्हणाले, कर्जबाजारी झालेल्या शेतकऱ्यांना शासनाने छत्रपती शिवाजी महाराज शेतकरी सन्मान योजनेच्या माध्यमातून कर्जमाफीचा निर्णय घेऊन शेतकऱ्यांचे कर्ज माफ केले.

कमी कर्जवाटपाबाबत नाराजी जिल्ह्यातील बॅंकनिहाय पीक कर्जवाटपाचा आढावा घेतेवेळी बॅंकांनी कमी प्रमाणात पीककर्जाचे वाटप केल्याबद्दल त्यांनी नाराजी व्यक्‍त केली. बॅंकांनी कर्जवाटपाच्या कामात गती वाढवत जिल्ह्यातील अधिकाधिक शेतकऱ्यांना पीककर्जाचे वाटप करण्याचे निर्देशही त्यांनी या वेळी उपस्थित बॅंक अधिकाऱ्यांना दिले. या वेळी जिल्ह्यातील लाभार्थ्यांना वाटप करण्यात आलेल्या कर्जाच्या रकमेचा सविस्तर आढावा घेतला. कर्जाच्या रकमेतून इतर बाबींसाठी रकमा बॅंकांनी वळती करून न घेण्याचे निर्देशही या वेळी श्री. रावते यांनी उपस्थित बॅंक अधिकाऱ्यांना दिले.

जिल्ह्यातील शेतकऱ्यांना वेळेत पीककर्ज उपलब्ध करून देण्यासाठी बॅंक अधिकाऱ्यांच्या सातत्याने बैठका घेऊन आढावा घेण्यात येत आहे. तालुकास्तरावर मेळाव्यांचेही आयोजन करण्यात येत आहे. तहसील स्तरावर शेतकऱ्यांचे अर्ज जमा करून घेऊन कागदपत्रांची तपासणी करण्यात येत असून, परिपूर्ण अर्ज बॅंकेकडे कर्ज मंजुरीसाठी पाठविणार आहेत. - रवींद्र बिनवडे, जिल्हाधिकारी