नाशिक जिल्हा बँकेत खडखडाट तरी सचिवांना पाच कोटी देण्याचा घाट

जिल्हा बँकेत खडखडाट तरी सचिवांना पाच कोटी देण्याचा घाट
जिल्हा बँकेत खडखडाट तरी सचिवांना पाच कोटी देण्याचा घाट

नाशिक : एकीकडे सभासदांना पुरेशी रक्कम देण्यास असमर्थता तसेच कर्मचारीही दोन महिन्यांपासून वेतनाविनाच असताना दुसरीकडे विविध कार्यकारी विकास सहकारी सोसायट्यांच्या सचिवांना सरचार्जपोटी पाच कोटी रुपये देण्याचा घाट जिल्हा मध्यवर्ती सहकारी बँकेने घातला आहे. शुक्रवारी (ता. १५) होणाऱ्या संचालक मंडळाच्या बैठकीत त्यासंदर्भातील प्रस्ताव मंजुरीसाठी ठेवण्यात आला असून, तो मंजूर होणार काय, याकडे कर्मचाऱ्यांचे लक्ष लागले आहे.

जिल्ह्यात सद्यःस्थितीत एकूण १,०६४ विविध कार्यकारी विकास सहकारी सोसायट्या असून, त्यांच्यामार्फत कर्जवाटप आणि वसुली करण्यात येत आहे. या सोसायट्यांच्या सचिवांना वसुलीपोटी दोन टक्के सरचार्ज बँकेकडून दिला जातो. गेल्या वर्षी बँकेची वसुली जवळपास ३५० कोटी रुपयांच्या घरात असून, सरचार्जपोटी सचिवांना तब्बल पाच कोटी रुपये देण्याचा प्रस्ताव आहे. खरे तर सरचार्ज द्यावाच लागणार असला तरी बँकेची सध्याची आर्थिक परिस्थिती कमालीची खालावली आहे. त्याचमुळे सभासदांना त्यांच्याच खात्यातील पुरेशी रक्कमही मिळत नसल्याचे चित्र आहे. जास्त रक्कम काढायची झाल्यास त्यामागे कारण द्यावे लागत आहे. म्हणजे बँकेच्या तिजोरीची स्थिती पाहूनच सावध पावले टाकण्याचे धोरण बँकेने स्वीकारले आहे.

दुसरीकडे कर्मचाऱ्यांना दर महिन्याला वेळेवर वेतन देण्यासही बँकेकडे पैसे नाहीत. दोन महिन्यांपासून कर्मचारी वेतनाविनाच आहेत. विशेष म्हणजे, दोन वर्षांपासून दिवाळीचा बोनसही मिळालेला नाही. दुसरीकडे मात्र सचिवांना सरचार्जपोटी पाच कोटी रुपये देण्याचा घाट घातला जात असल्याने यात नेमके कोणाचे आणि काय हित दडले आहे, असा प्रश्‍न विचारला जात आहे. 

सचिवांना सरचार्ज देण्यासंदर्भात सहकार विभागाचे आदेश आहेत की नाही, याविषयीच साशंकता आहे. बँकेची आर्थिक परिस्थिती हलाखीची असल्याने सहकार विभाग सरचार्जदेण्यासंदर्भात अनुकूल असण्याची शक्यता कमी आहे. तसेच बँकेची परिस्थिती पाहून अध्यक्ष केदा आहेर यांनी बँकेचे वाहन तसेच भत्त्यांचा त्याग केला आहे. अन्य संचालकांनीही त्यांचे अनुकरण केले आहे. दैनंदिन खर्चातदेखील कपात करण्यात आली आहे. त्यामुळे सरचार्ज देण्याचे खूळ नेमके कोणाचे, हाही प्रश्‍नच आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com