जिल्हाधिकारी पोचले शेतबांधावर

यवतमाळ : शेतकऱ्यांच्या समस्या, त्यांच्या अडीअडचणी, योजनांची माहिती, कृषी विभागाचा समन्वय, मागेल त्याला शेततळे योजना आदी अनेक योजनांची वास्तव स्थिती जाणून घेण्यासाठी जिल्हाधिकारी थेट तालुक्‍यातील सहा गावांच्या शेतकऱ्यांच्या बांधावर पोचले. शेतकऱ्यांना असलेल्या समस्यांबाबत त्यांच्याशी संवाद साधत त्यांच्या अडीअडचणी जाणून घेतल्या.  शेतकऱ्यांसाठी कृषी विभागाच्या योजनांपैकी अनेक योजना कागदोपत्रीच शेतकऱ्यांपर्यंत पोचतात. परिणामी, शेतकऱ्यांना योजनेचा लाभ मिळत नाही. शेतकऱ्यांपर्यंत योजना पोचाव्यात, त्यासाठी जिल्हाधिकारी डॉ. राजेश देशमुख यांनी जिल्ह्यात भेटी देण्याचे नियोजन केले आहे. थेट शेतकऱ्यांच्या बांधावर जाऊन शेतकऱ्यांशी संवाद साधत अडीअडचणी जाणून घेत आहेत. त्यासाठी जिल्हाधिकाऱ्यांनी पुसद तालुका निवडला. तालुक्‍यातील यंत्रणेकडून आढावा घेतल्यानंतर त्यांनी बांधाकडे आपला मोर्चा वळविला. जिल्हाधिकारी डॉ. देशमुख यांनी गायमुखनगर, आसार पेंड, इंदिरानगर, कोंडइ, हर्षी, वेणी, वालतूर, आडगाव आदी ठिकाणी भेटी दिल्या. भेटीत त्यांनी शेतकऱ्यांशी संवाद साधला. निवासी शासकीय शाळा, रेशीम शेती, फुलशेती, शेततळ्याची पाहणी, शेतकरी उत्पादक कंपनीच्या प्रकल्पाला भेट, निवासी शासकीय आश्रमशाळेतील सोयीसुविधांची पाहणी, बचत गटांची दालमिल, शेळीपालन प्रकल्प, विहीर पुनर्भरण कार्यक्रम, केळी पीकपाहणी, सेंद्रिय खतनिर्मिती प्रकल्प, उन्नतशेती समृद्ध शेतकरी अभियान आदी कामांची पाहणी केली. या ठिकाणी काही शेतकऱ्यांनी आपली गऱ्हाणी जिल्हाधिकाऱ्यांसमोर मांडली. त्यांच्या अडचणी सोडवीत त्यावर तत्काळ अंमलबजावणी करण्याचे आदेश डॉ. देशमुख यांनी यंत्रणेला दिले.  पहिलीच व्हिजिट एखाद्या जिल्हाधिकाऱ्यांनी प्रत्यक्ष बांधावर जाऊन एकाचदिवशी इतक्‍या गावांना भेट देण्याची ही पहिलीच वेळ आहे. जिल्हाधिकाऱ्यांनी प्रत्यक्ष शेतकऱ्यांशी मनमोकळेपणे संवाद साधल्याने शेतकऱ्यांनीही बिनधास्तपणे आपल्या समस्या मांडल्या.