अकोला, नगरचे जिल्हा मार्केटिंग अधिकारी निलंबित

मुंबई : किमान आधारभूत किमतीने शेतीमाल खरेदीच्या बाबतीत चालढकल करणाऱ्या अकोला आणि नगरच्या जिल्हा मार्केटिंग अधिकाऱ्यांना उदासीनता चांगलीच भोवली आहे. या दोन्ही जिल्ह्यांतील शेतकऱ्यांशी स्वतः बोलून खात्री केल्यानंतर पणनमंत्री सुभाष देशमुख यांनी संबंधित दोन्ही जिल्हा मार्केटिंग अधिकाऱ्यांना निलंबित करण्यााचे आदेश दिले.

सध्या हमीभावाने उडीद, मूग आणि सोयाबीनची खरेदी सुरू आहे. सोयाबीनची १२६ केंद्रे, मुगासाठी ८६ आणि उडीद खरेदीसाठी ८९ हमीभाव केंद्रे सुरू आहेत. खरेदी केंद्रांवर विक्रीसाठी येत असलेल्या शेतीमालामध्ये आर्द्रता १४ टक्क्यांपासून ते २० टक्के इतकी आढळून येत आहे. केंद्र सरकारच्या निर्देशानुसार कमाल १२ टक्के आर्द्रता असणे आवश्यक आहे. आर्द्रता अधिक असल्याने शेतकऱ्यांकडून सोयाबीन, मूग आणि उडदाची खरेदी कमी प्रमाणात होत आहे. तसेच विक्रीसाठी येत असलेला शेतीमाल एफएक्यू दर्जाचा नसल्याचे पणन महामंडळाचे अधिकारी सांगत आहेत. त्यामुळे खरेदीला गती नसल्याचे समजते.

मात्र काही जिल्ह्यांत जिल्हा मार्केटिंग अधिकारी यांच्या स्तरावर शेतमाल खरेदीत उदासीनता आढळून येत आहे. पणनमंत्री सुभाष देशमुख यांच्याकडे याबाबतच्या तक्रारी आल्या होत्या. बुधवारी त्यांनी स्वतः याची खातरजमा करून घेतली. अकोला आणि नगर जिल्ह्यांतील नोंदणी केलेल्या शेतकऱ्यांना मंत्री देशमुख यांनी स्वतः फोन केले. या वेळी शेतकऱ्यांनी त्यांना नोंदणीनंतर खरेदी केंद्रावर कधी शेतीमाल आणायचा याचा मोबाइल संदेश आला नसल्याचे सांगितले. शेतकऱ्यांनी शेतीमालाची नोंदणी करून महिना झाला तरी जिल्हा मार्केटिंग अधिकारी यांच्याकडून दुर्लक्ष केले जात आहे.

शेतीमाल खरेदीच्या बाबत ते गंभीर दिसून येत नाहीत हे लक्षात आल्याने मंत्री देशमुख यांनी ही बाब गंभीरपणे घेतली. तसेच अकोला आणि अहमदनगरच्या जिल्हा मार्केटिंग अधिकारी यांना निलंबित करावे, असे आदेश त्यांनी पणन महामंडळाच्या वरिष्ठांना दिले. ही कारवाई तातडीने करावी असे निर्देश देण्यात आल्याचे पणन विभागातील उच्चपदस्थांनी दिले आहेत. त्यामुळे भविष्यात कोणी शेतकऱ्यांच्या शेतमाल खरेदी बाबत चालढकल केल्यास अशाच स्वरूपाच्या गंभीर कारवाईला सामोरे जावे लागू सकते अशी चर्चा आहे.