‘खेती पे चर्चा’ करून जमिनी बळकावू नका

संग्रहित छायाचित्र
संग्रहित छायाचित्र

लातूर : पंतप्रधान नरेंद्र मोदी यांनी २०१४ च्या लोकसभेच्या निवडणुकीत विदर्भात ‘चाय पे चर्चा’ केली होती. शेतकऱ्यांच्या आत्महत्या होणार नाहीत असे धोरण राबविण्याचे आश्वासन दिले होते. पण जेथे त्यांनी ही चर्चा केली तेथेच सर्वांत जास्त शेतकऱ्यांच्या आत्महत्या झाल्या आहेत. या चर्चेनंतर शेतकऱ्यांच्या हातून ‘कप’ गेला. आता ते ‘खेती पे चर्चा’ करणार आहेत. यात शेतकऱ्यांच्या हातून जमीन जाऊ नये हीच अपेक्षा आहे, अशी उपरोधिक टीका शेतकरी संघटनेचे नेते खासदार राजू शेट्टी यांनी येथे गुरुवारी (ता. १५) केली.

 या वेळी त्यांनी कृषी राज्यमंत्री सदाभाऊ खोत यांनी हिरवा गॉगल घातल्याने त्यांना सर्व शिवार हिरवेगार दिसत आहे, असा टोलाही लगावला.

येथे आयोजित पत्रकार परिषदेत ते बोलत होते. मराठवाड्यात गारपिटीमुळे मोठे नुकसान झाले आहे. राज्य सरकारने मदतीची घोषणा देऊन शेतकऱ्यांच्या तोंडाला केवळ पाने पुसण्याचे काम केले आहे. शेतातील कसपट काढण्यासाठी दहा हजार रुपये लागणार आहेत. शासन मात्र दोन हजार चारशे रुपये देणार आहे. शासन शेतकऱ्यांची चेष्ठा करीत आहे. कर्जमाफीचे २३ हजार कोटी रुपये बँकेत जमा केले असे शासन सांगत आहे. पण हे कोणाच्या खात्यावर गेले हे मात्र सांगत नाही. भूलथापा देऊन हे शासन सत्तेवर आले आहे. येत्या काळात शेतकऱ्यांच्या प्रश्नावर मंत्र्यांना झो़डपून काढण्याचे आंदोलन करण्याचा इशाराही त्यांनी या वेळी दिला.

साखरेचे भाव पाडण्याचा प्रकार संशयास्पद आहे. व्यापाऱ्यावरील स्टॉकवरील नियंत्रण उठविल्यानंतर हे भाव पडले आहेत. त्यामुळे शासनाने गोदाम तपासून दोन महिन्यांत झालेली साखरेची खरेदी- विक्रीची चौकशी करावी अशी मागणी आहे. कारखान्यांनी ठरलेली उचल दिलीच पाहिजे या करिता १७ फेब्रुवारी रोजी कोल्हापूरमध्ये मोर्चा काढण्यात येणार आहे, असे ते म्हणाले.

कृषी राज्यमंत्री सदाभाऊ खोत संघटना सोडून गेल्याने संघटनेला काहीच फरक पडला नाही. आता त्यांची दृष्टी बदलली आहे. हिरवा गॉगल त्यांनी घातला आहे. त्यामुळे त्यांना शेतकऱ्यांच्या प्रश्नाऐवजी सर्व शिवार हिरवे दिसू लागले आहे. सर्वत्र आनंदी आनंद दिसत आहे, अशी टीका श्री. शेट्टी यांनी या वेळी केली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com