विजयदादा यांना तेव्हा स्थिरीकरण आठवले नाही का? : शरद पवार

सोलापूर : सहकारमहर्षी शंकरराव मोहिते पाटील यांनी स्वाभिमानाची लढाई लढत राजकारण केले. आम्ही विजयदादा यांना मोठी संधी दिली. बांधकाममंत्री, साखर संघाचे अध्यक्ष, ग्रामविकास मंत्र्यापासून उपमुख्यमंत्रिपदापर्यंत अनेकदा संधी दिली. विरोध असतानाही सर्व पदे दिली. त्या वेळेस त्यांना स्थिरीकरणाचे डोक्यात आले नाही का? आताच स्थिरीकरण आठवते आहे, अशा शब्दांत राष्ट्रवादी काँग्रेसचे अध्यक्ष शरद पवार यांनी शुक्रवारी (ता. १९) नातेपुते येथे मोहिते पाटील यांच्या भाजप प्रवेशावर पहिल्यांदाच मत व्यक्त केले. 

माढा मतदारसंघातील उमेदवार संजय शिंदे यांच्या प्रचारार्थ नातेपुते (ता. माळशिरस) येथे आयोजित प्रचार सभेत पवार बोलत होते. उमेदवार संजय शिंदे, आमदार अॅड. रामहरी रुपनवर, रामदास देशमुख, अॅड. सुभाष पाटील, राष्ट्रवादी काँग्रेसचे भारत जाधव, संतोष पवार आदी उपस्थित होते. 

पवार म्हणाले, ‘‘ज्या घराण्यावर आजचे पंतप्रधान टीका करतात, त्या इंदिरा गांधी यांनी देशाला स्थिर सरकार दिले. देशाची प्रतिष्ठा वाढवली. राजीव गांधी यांनी आधुनिकतेची कास धरल्याने आज देशात तंत्रज्ञानाचा विकास झाला. त्यांनी देशासाठी योगदान दिले. मात्र विकासावर आणि स्वतःच्या कामावर बोलण्यापेक्षा वैयक्तिक टीकेवरच या प्रधानसेवकाचा भर राहिला आहे. ‘‘

त्यांना आमच्या कुटुंबाची काळजी लागली आहे. स्वतःचे कुटुंब नसल्याने त्यांना एकीचे महत्त्व समजणार नाही. पण आमच्यावर आईचे संस्कार आहेत. माझ्या घरात मुलीचे लग्न झाले आहे. आम्ही जिवाभावाने एक आहोत. त्यामुळे मोदींनी दुसऱ्याच्या घरात वाकून बघायचे बंद करावे, असा टोलाही पवार यांनी लगावला. 

या वयात पाय, मांड्या बघायची वेळ नको

मोहिते पाटील यांच्या भाजप प्रवेशावर पवार यांनी तीव्र शब्दांत टीका केली. इथल्या नेत्यांनी हाफ पँट, डोक्यावर काळी टोपी घातली आहे. मात्र, या वयात तुमचे पाय-मांड्या बघायची वेळ येऊ देऊ नका, असा उपरोधिक टोलाही पवार यांनी मोहिते पाटील यांना लगावला.