सरपंचांनी कारकीर्दचे स्मरण होईल असे काम करावे : चंद्रकांत दळवी

कोल्हापूर : सरपंचांनी नैतिकता जपत निरपेक्ष व निपक्ष:पातीपणे काम करावे, त्यातून गावावर चांगले संस्कार होतील, असे प्रतिपादन पुणे विभागीय आयुक्त चंद्रकांत दळवी यांनी केले.

जिल्हा परिषदेच्या वतीने देण्यात येणारे यशवंत सरपंच पुरस्कार, यशवंत ग्रामपंचायत जिल्हास्तर आणि तालुकास्तर पुरस्कार तसेच आदर्श ग्रामसेवक पुरस्कारांचे वितरण कोल्हापूर येथील शाहू सांस्कृतिक मंदिर येथे जिल्हा परिषद अध्यक्षा शौमिका महाडीक यांच्या हस्ते करण्यात आले. श्री. दळवी यांची प्रमुख उपस्थिती होती. त्यावेळी ते बोलत होते.

ते म्हणाले, ग्रामसेवक व सरपंच यांनी समन्वयाने काम केल्यास ग्रामपातळीवर फार मोठे परिवर्तन होईल. पुढील वर्षापासून अत्यंत चांगला समन्वय असणाऱ्या ग्रामसेवक व सरपंच यांनाही जिल्हा परिषदेने पुरस्कार जाहीर करावे, असे सांगितले. यावेळी त्यांनी लोकांमधून थेट सरपंचांची निवड करणे हा शासनाचा अत्यंत महत्त्वपूर्ण व उत्कृष्ट निर्णय असून मिळालेल्या पाच वर्षांच्या कालावधीमध्ये सांडपाणी व्यवस्थापन, घनकचरा व्यवस्थापन, स्वच्छता मोहीम हे प्रश्न प्राधान्याने हाताळल्यास लोकांच्या आरोग्याच्या समस्या कमी होतील.

२०१६-१७ मध्ये जिल्हा स्थरावर यशवंत ग्रामपंचायत पुरस्कारामध्ये प्रथम क्रमांक मिळविल्याबद्दल हातकणंगले तालुक्‍यातील शिरोली (पुलाची) ग्रामपंचायतीचा, द्वितीय क्रमांक मिळविल्याबद्दल आजरा तालुक्‍यातील लाटगाव ग्रामपंचायतीचा सत्कार करण्यात आला. तसेच २०१७-१८ मध्ये जिल्हा स्तरावर आजारा तालुक्‍यातील उत्तूर ग्रामपंचायतीसह कागल तालुक्‍यातील खडकेवाडा ग्रामपंचायतीला विभागून प्रथम क्रमांक देण्यात आला.

द्वितीय क्रमांक करवीर तालुक्‍यातील बेले ग्रामपंचायतीला देण्यात आला. यावेळी यशवंत सरपंच पुस्कारप्राप्त तालुका स्थरावरील प्रथम क्रमांकाचे सरपंच, आदर्श ग्रामसेवक यांचा गौरव करण्यात आला.

जिल्हाधिकारी अविनाश सुभेदार, मुख्य कार्यकारी अधिकारी डॉ. कुणाल खेमणार, जिल्हा परिषद उपाध्यक्ष सर्जेराव पाटील, बांधकाम व आरोग्य सभापती समिती सर्जेराव पाटील, शिक्षण व अर्थ समिती सभापती समिती अंबरिषसिंह घाटगे, महिला व बालकल्याण समिती सभापती शुभांगी शिंदे, औरंगाबाद जिल्ह्यातील पाटोदाचे सरपंच भास्कर पेरे पाटील इंद्रजित देशमुख आदी उपस्थित होते.