अकोला : डॉ. पंजाबराव देशमुख कृषी विद्यापीठाची ओळख बनलेली डाळमिल आता राष्ट्रीय स्तरावर पोचली आहे. या डाळगिरणीच्या निर्मितीसाठी हरियानातील एका खासगी कंपनीसोबत शनिवारी (ता. १८) विद्यापीठाचा सामंजस्य करार झाला.
डॉ. पंजाबराव देशमुख कृषी विद्यापीठाने विविध शेतीउपयोगी अवजारे, उपकरणे, यंत्र तयार केले. त्यामध्ये डाळमिल ही सर्वाधिक लोकोपयोगी बनली आहे. विद्यापीठाला यंत्रनिर्मितीसाठी मर्यादा असल्याने विविध खासगी कंपन्यांसोबत करार करून यंत्रे शेतकऱ्यांसाठी उपलब्ध करून दिली जातात.
आता डाळमिलसुद्धा उत्तर भारतात उपलब्ध होणार आहे.
विद्यापीठाने यंत्रनिर्मितीसाठी अंबाला कॅन्ट (हरियाना) येथील इंडोसा इंडस्ट्रिअल प्रोडक्टस प्रा. लि.सोबत मिनी डाळमिल निर्मितीसाठी करार केला.
या वेळी विद्यापीठाच्या कृषी अभियांत्रिकी अधिष्ठाता डॉ. एम. बी. नागदेवे, संशोधन संचालक डॉ. व्ही. के. खर्चे, कुलसचिव डॉ. पी. आर. कडू, विद्या पवार, संशोध अभियंता डॉ. प्रदीप बोरकर, कंपनीचे मॅनेजिंग डायरेक्टर अजय सागर, चिफ जनरल मॅनेजर डॉ. विनोद काळबांडे आदी उपस्थित होते.
या वेळी श्री. खर्चे यांनी सामंजस्य कराराच्या माध्यमातून शास्त्रज्ञांचे संशोधन सर्वांना दिसत असून, खासगी निर्मात्यांसोबत करार होत असल्याने गरजेनुसार नवनवीन यंत्रे व उपकरणे तयार करण्यासाठी मदत मिळत आहे.
डॉ. कडू यांनी या करारामुळे विद्यापीठामध्ये गरजेनुसार बहुउपयोगी यंत्र निर्माण होत असल्याने खासगी निर्मात्यांची जास्त ओढ आहे. या वेळी डॉ. काळबांडे, अजय सागर, डॉ. बोरकर यांनीही मनोगत व्यक्त केले. कार्यक्रमासाठी प्रा. राजेश मुरुमकार, प्रा. वासुदेव मते, महेंद्र राजपूत, जनार्दन निंबाळकर, नीलेश राठोड, अविनाश देशमुख यांनी पुढाकार घेतला.