कोल्हापुरात प्रतिकूल हवामानामुळे पिकांवर कीड-रोगांचा धोका

कोल्हापूर  ः अतिपावसाचे संकट दूर होते न होते तोच जिल्ह्यात गेल्या आठ दिवसांपासून कडक ऊन पडत अाहे. प्रतिकूल हवामानामुळे भात, भुईमूग आदी पिकांत किडी-रोगांचा प्रादुर्भाव होण्याचा धोका निर्माण झाला आहे.

हवेतील आर्द्रता, ढगाळ वातावरण, अचानक वाढलेले तापमान असे वातावरण शिवारात आहे. जिल्ह्याच्या पश्‍चिम भागात भात, भुईमूग आदी पिके परिपक्वतेच्या अवस्थेत आहेत. आठ दिवसांपासून विशेष करून पश्‍चिम भागात पाऊस थांबला आहे. गेले तीन महिने संततधार बरसणारा पाऊस थांबल्याने शेतकऱ्यांनी समाधान व्यक्त केले. परंतु त्यानंतर मात्र उष्णतेत एकदम वाढ झाली.

वाढते तापमान मध्येच ढगाळ हवामान आदींचा विपरीत परिणाम पिकांच्या वाढीवर होत आहे. खरिपातील मुख्य पिक असलेल्या जिल्ह्याच्या पश्‍चिम भागात भातपिकावर खोड किडा, तपकिरी तुडतुडे, निळे भुंगेरे, पाने खाणारी अळी आदी किडींचा प्रादुर्भाव होण्याची शक्‍यता वाढली आहे. भुईमुगावर पाने गुंडाळणारी अळी, मावा तसेच पाने खाणाऱ्या अळीचा प्रादुर्भाव होण्याची शक्‍यता आहे. शेतकऱ्यांनी  याबाबत त्वरित उपाययोजना कराव्यात अशा सूचना कृषी विभागाने केल्या आहे.

पूर्व भागात पावसाचे प्रमाण कमी होते. परंतु पश्चिमेकडे झालेल्या पावसाने हातकणंगले, शिरोळ तालुक्‍यातील नद्यांना पाणी आले. पर्यायाने नदीकाठावरील कृषिपंप काढावे लागले. कडक ऊन असले तरी पंप काढून ठेवल्याने खरीप पिकांना पाणी देणे अशक्‍य बनले होते. सध्या नद्यांचे पाणी ओसरले आहे. कोणत्याही परिस्थितीत उसासहित अन्य खरीप पिकांना पाण्याची गरज असल्याने या भागातील शेतकरी तातडीने पिकांना पाणी देण्यासाठी गडबड करीत आहे. वाढते तापमान पिकांसाठी प्रतिकूल ठरत आहे. अचानक वाढलेल्या ऊन व आर्द्रतेमुळे यंदाचा खरीप वाचविण्याचे मोठे आव्हान जिल्ह्यातील शेतकऱ्यांसमोर उभे ठाकले आहे.

  कृषी विभागाने दिल्या सूचना भातावरील खोड किडा, तपकिरी तुडतुडे, निळे भुंगेरे, पाने खाणारी अळी तसेच करपा, कडा करपा यांसारख्या कीड-रोगांच्या नियंत्रणासाठी कृषी विद्यापीठांनी शिफारस केलेल्या कीडनाशकांची फवारणी करावी. याबाबत अधिक माहितीसाठी तालुका कृषी अधिकारी कार्यालयाशी संपर्क साधावा, अशी सूचना कृषी विभागाने केली आहे.