लिलाव बंदमुळे बाजार समित्यांतील आवक ठप्पच

जळगाव : कडधान्याला जे हमीभाव केंद्राने जाहीर केले, तेवढे दर खासगी बाजारात कुठेही नाहीत. त्या दरात खरेदी शक्‍यच नाही. हमीभावापेक्षा कमी दरात खरेदीसंबंधी हमीपत्र लिहिणे आणि कमी दरात खरेदीसाठी स्पष्ट सूचनांचे परिपत्रक शासनाने जारी करावे, असा मुद्दा बाजार समित्यांमधील अडतदार, व्यापारी उपस्थित करीत आहेत. परिणामी जिल्ह्यातील बहुतांश बाजार समित्यांमध्ये लिलावही बंद आहेत. त्यामुळे धान्याची आवक पूर्णपणे ठप्प आहे.  

जळगाव, पाचोरा, अमळनेर, चोपडा, चाळीसगाव, जामनेर या प्रमुख बाजार समित्या बंद अवस्थेत आहेत. लिलाव सुरू केव्हा होतील, याची शेतकऱ्यांना प्रतीक्षा आहे. जिल्ह्यात मुगाची मळणी जवळपास आटोपली आहे. त्याचे उत्पादन कमी असून हा माल अधिक दिवस घरात साठविता येणार नाही. हा शेतमाल कुठे विकायचा, असा मुद्दा शेतकरी उपस्थित करीत आहेत.

मूग, उडदाची खेडा खरेदी होत नाही. कारण या कडधान्याची फारशी मागणी देशातील बाजारात नसल्याचे अडतदारांचे म्हणणे आहे. पाच-सहा दिवसांपूर्वी मुगाची भुसावळ, जामनेर बाजारात आवक झाली होती. लिलावही सुरू झाले. पाच हजार रुपये प्रतिक्विंटलने खरेदीही झाली. परंतु हमीभावापेक्षा कमी दरात खरेदी केल्यास दंड व कैदेची शिक्षा होईल, अशी भीती व्यापाऱ्यांमध्ये वाढली. शिक्षेबाबत आदेश वा परिपत्रक निघालेले नाही, असे जळगाव बाजार समितीने व्यापाऱ्यांना सांगितले. पण तरीही व्यापाऱ्यांनी खरेदी सुरू केलेली नाही. चोपडा, जळगाव, पाचोरा, अमळनेर येथे लिलाव ठप्प आहेत. आता उडदाची मळणी सुरू झाली आहे. त्याची आवक पोळा सणानंतर वाढेल. तोपर्यंत बाजार समित्या सुरळीत झाल्या नाहीत, तर शेतमालाच्या दरांवरील दबाव वाढू शकतो, असे शेतकऱ्यांचे म्हणणे आहे.