भारत-इस्राईलच्या समन्वयातून दुग्धोत्पादन वाढेल ः सॅमसन टाकर

इस्लामपूर, जि. सांगली : इस्राईल देशात शेती व दुग्धउद्योगास प्रतिकूल परिस्थिती असतानाही या देशात उच्च तंत्रज्ञानाचा उपयोग करून उच्चांकी उत्पादन घेतले जाते. इस्राईल देशाप्रमाणे भारतामध्येही उच्च तंत्रज्ञानाचा उपयोग करून शेतीच्या व दुग्धउत्पादनात वाढ केली जाऊ शकते. त्यासाठी दोन्ही देशांतील तज्ज्ञ व संस्थांनी एकत्र यायला हवे, अशी भावना इस्राईलमधील एरियल ग्लोबलचे संचालक सॅमसन टाकर यांनी राजारामनगर येथे व्यक्त केली.

सॅमसन टाकर हे मूळचे कोल्हापूर जिल्ह्यातील असून, ते गेल्या ४० वर्षांपासून इस्राईल देशात शेती व दुग्धव्यवसायातील उत्पादनवाढीसाठी काम करीत आहेत. त्यांनी नुकतीच राजारामबापू सह. साखर कारखाना व राजारामबापू सह.दूध संघास सदिच्छा भेट दिली. कारखान्याचे उपाध्यक्ष विजयबापू पाटील यांनी त्यांचे कारखाना कार्यस्थळावर स्वागत केले. या प्रसंगी संचालक विराज शिंदे, श्रेणीक कबाडे, आष्ट्याचे डॉ. गुंडूभाऊ गोरडे, ओव्हरशिज बिझनेसचे व्हा. प्रेसिडेंट सुभाषराव जमदाडे प्रामुख्याने उपस्थित होते.