अकोल्यात उत्पादनाअभावी शेतकरी तोडताहेत डाळिंबाच्या बागा

अकोला : पारंपरिक पिकांपासून फळपिकांकडे वळालेल्या शेतकऱ्यांना डाळिंबापासून पुरेशे उत्पादन मिळत नसल्याने बागा तोडण्याची वेळ अाली अाहे. प्रामुख्याने अकोट तालुक्यात हा प्रकार अधिक वाढला असून एकट्या बोर्डी गावात वर्षभरात तीन शेतकऱ्यांनी डाळिंबाच्या बागा तोडल्या.

कुठलाही खर्चसुद्धा यापासून शेतकऱ्यांचा निघू शकला नाही. यामध्ये कृषी विभागाकडून पुरेशी माहिती दिली जात नसल्याचेही कारण हे शेतकरी व्यक्त करीत अाहेत.

अकोट तालुक्यात सातपुड्याच्या पायथ्याशी बागायती शेतीचे प्रमाण अधिक अाहे. शेतकरी अाता काळानुरूप पीक पद्धती बदलण्याकडे वळत अाहेत. पारंपरिक पिकांसोबतच थोड्याफार क्षेत्रात डाळिंब, लिंबू, केळी, संत्रा अशा फळबागाही उभ्या करीत अाहेत. लागवडीसाठी कृषी विभागाकडून प्रोत्साहन दिले जाते. परंतु नंतर फारशी माहिती दिली जात नसल्याचा अारोप शेतकरी करीत अाहेत.

एकीकडे फळबाग क्षेत्र वाढावे म्हणून अनेक योजना राबविल्या जातात. नंतर शेतकऱ्यांच्या बांधावर जाऊन पाहिजे त्या उपाययोजनांचा जागर होताना दिसत नाही. याचाच जबर फटका डाळिंब बागायतदारांना अधिक बसला अाहे. बोर्डी गावात तीन वर्षांपूर्वी सहा शेतकऱ्यांनी डाळिंब लागवड केली होती.

यापैकी तिघांनी बागा तोडण्याचा निर्णय घेतला. दोन बागा पूर्णतः तोडून पारंपरिक पिके पुन्हा घेण्याकडे हे शेतकरी वळाले तर अाता रामभाऊ भालतिलक यांची बाग तोडणी सुरू अाहे.

खर्च जास्त, उत्पन्न कमी डाळिंबाच्या बागेचे व्यवस्थापन करताना खर्च अधिक लागतो. एकरी ८० ते ९० हजारांपर्यंत खर्च होत असताना उत्पन्न ५० ते ६० हजार होते. त्यामुळे ही बाग जोपासणे तोट्याचे झाले असल्याचे या शेतकऱ्यांचे म्हणणे अाहे. यातूनच अनिल अातकड यांनी सहा एकर, अशोक ताडे यांनी चार एकरातील बाग तोडली. अाता राम भालतिलक चार एकरांतील बाग तोडत अाहेत.

फळपीक विम्याचाही अाधार नाही पीकविमा हा शेतकऱ्यांना मोठा अाधार असतो, असा प्रचार शासन करते. परंतु अकोला जिल्ह्यात डाळिंब पिकाला फळपीक विम्याचा लाभ दिला जात नाही. हे पीक विम्याच्या कार्यक्षेत्रात गृहीत धरले जात नाही. यामुळे शेतकऱ्यांना अापत्तीच्या काळात कुठलीही मदत मिळत नाही.