नियमांमधील बदलांनंतर ई-नाम होणार प्रभावी

पुणे : आॅनलाइन राष्ट्रीय कृषी बाजार (ई-नाम)च्या प्रभावी अमंलबजावणीसाठी पणन नियमांमध्ये विविध सुधारणा करण्यात येणार आहेत. या सुधारणांचा प्रस्ताव पणन संचालनालयाद्वारे शासनाला पाठविण्यात आला असून, नियमांमधील बदलांनंतर ई-नाम याेजना अधिक प्रभावीपणे राबविली जाईल, असा विश्‍वास पणन संचालनालयाकडून व्यक्त हाेत आहे.

ई-नाममध्ये दाेन टप्प्यांत राज्यातील ६० बाजार समित्यांचा समावेश करण्यात आला आहे. यामधील ४८ बाजार समित्यांमध्ये प्रत्यक्षात कामकाज सुरू झाले असून, अधिक प्रभावीपणे राबविली जात नसल्याने शेतकरी आणि व्यापाऱ्यांना विविध अडचणींना सामाेरे जावे लागत आहे. यासाठी पणनच्या नियमांमध्ये बदल पणन संचालनालयाकडून सुचविण्यात आले आहेत.

यामध्ये ई-नाम प्रक्रियेमध्ये सहभागी हाेणाऱ्या व्यापाऱ्यांना आता परवान्यांएेवजी नाेंदणी करणे बंधनकारक करण्यात येणार आहे. केवळ एकाच बाजार समितीमध्ये खरेदी करणाऱ्या व्यापारी, खरेदीदारांना त्याच बाजार समितीमध्ये नाेंदणी करावी लागणार आहे. तर एकापेक्षा अधिक बाजार समित्यांमधून खरेदी करावयाची असल्यास अशा व्यापाऱ्यांना पणन संचालनालयाकडे नाेंदणी करणे बंधनकारक करण्यात येणार आहे. तसेच खरेदीदारांना बॅंक गॅरंटीदेखील द्यावी लागणार असून, ही गॅरंटी डायनॅमिक कॅश आॅर्डरप्रमाणे असणार आहे. या कॅश क्रेडिटच्या प्रणालीमुळे जेवढ्या किमतीचा शेतमाल खरेदी केली आहे. तेवढे पैसे बॅंक गॅरंटीमधून वजा हाेणार आहे. या प्रणालीमुळे शेतकऱ्यांकडून अतिरिक्त रकमेचा शेतमाल खरेदी करून नंतर हाेणारी संभाव्य फसवणूक टाळता येणार आहे.

ई-नामद्वारे हाेणाऱ्या लिलावांमध्ये अधिक सुसूत्राता आणत शेतकरी आणि खरेदीदारांना ही प्रणाली साेपी व्हावी, यासाठी विविध नियमावली करण्यात येत आहेत. यासाठी पणन नियमांमध्ये बदल सुचविले असून, ते शासनाला सादर करण्यात आले आहेत. या बदलांना लवकरच मान्यता मिळून योजना प्रभावीपणे राबविली जाईल. - डॉ. अानंद जाेगदंड , पणन संचालक