ई-पॉस मशिनमधून खतसाठा होतोय गायब

जळगाव : जिल्ह्यात ई-पॉस (पॉइंट ऑफ सेल) मशिनसंबंधीचा गोंधळ कायम असून, मशिनमध्ये नोंदवूनही शिलकी खतसाठा न दिसणे, मशिन चार्जिंग न होणे आदी समस्या खत विक्रेत्यांसमोर आहेत. यातच राष्ट्रीय केमिकल्स अँड फर्टिलायझर्स (आरसीएफ) कंपनीची जवळपास १५ नादुरुस्त ई-पॉस मशिन खत विक्रेत्यांनी कृषी विभागाकडे जमा केली आहेत. जिल्ह्यात ई-पॉसचे १०० टक्के काम झाल्याचा दावा कृषी विभागाने केला असून, पहिल्या टप्प्यात जवळपास ११०० मशिन कार्यरत झाली आहेत. या मशिनच्या माध्यमातून शिलकी खतसाठा, रिप्लाय (माहितीसंबंधीचे प्रतिसाद), अशी कार्यवाही यशस्वी झाली. त्याच्या नोंदी केंद्र सरकारच्या एमएफएमएस (मोबाईल फर्टिलायझर मॉनेटरिंग सिस्टिम) या संकेतस्थळावर झाल्या.

परंतु मागील आठ ते १० दिवसांपासून काही खत विक्रेत्यांना खतपुरवठा झाल्यानंतर त्याची ई-पॉसमध्ये नोंद करूनही दुसऱ्या दिवशी संबंधित खताचा साठा दिसत नाही. हा खतसाठा ई-पॉसमध्ये दिसत नाही म्हणून दुकानात संबंधित खत असूनही त्याची विक्री करता येत नाही. विक्री केली, तर कच्ची पावती द्यावी लागते आणि कच्ची पावती देऊ नका, असे आदेश शासनाचे आहेत. हे आदेश धुडकावले तर कारवाईचा बडगा उगारला जातो. ई-पॉसच्या सदोष यंत्रणेमुळे खतविक्रेते त्रस्त असल्याचे चित्र जिल्ह्यात आहे.

तीन कंपन्यांचे सॉफ्टवेअर ई-पॉस मशिनसंबंधीचे सॉफ्टवेअर तीन कंपन्यांचे आहे. ते परदेशातून आयात केले असून, यातील दोन कंपन्यांची मशिन व्यवस्थित कार्यरत आहेत. परंतु एका कंपनीचे मशिनचे सॉफ्टवेअर व्यवस्थित काम करीत नाहीत, अशी माहिती मिळाली.

राष्ट्रीय केमिकल्स अँड फर्टिलायझर्सने जिल्ह्यात एक हजार ई-पॉस मशिनचा पुरवठा केला. यात एका कंपनीने पुरवठा केलेल्या मशिनसंबंधी तांत्रिक अडचणी येत आहेत. मध्यंतरी खतसाठा मशिनमध्ये न दिसण्याच्या अडचणीही होत्या. पण ती बॅकअपसंबंधीची समस्या आहे. ती एक दोन दिवसांत दूर होते. - योगेश वेंगुर्लेकर, जिल्हा व्यवस्थापक, राष्ट्रीय केमिकल्स अँड फर्टिलायझर्स

ई-पॉससंबंधी जिल्ह्यात १०० टक्के काम झाले आहे. ११०० मशिन काम करीत आहेत. काही तांत्रिक अडचणी आहेत. त्यात मशिन चार्जिंग न होणे, त्याचे सॉकेट नादुरुस्त होणे आदींचा समावेश आहे. तशी काही मशिन कृषी विभागाकडे खत विक्रेत्यांनी जमा केली. पण या अडचणी दूर केल्या जात आहेत. - मधुकर चौधरी, कृषी विकास अधिकारी, जळगाव