जिल्हा परिषद अध्यक्षांसह संचालकांवर ठपका

सोलापूर : कुर्डुवाडी कृषी उत्पन्न बाजार समितीतील कामकाजाबाबत जिल्हा परिषदेचे अध्यक्ष आणि कुर्डुवाडी बाजार समितीचे संचालक संजय शिंदे यांच्यासह संचालक व सचिवांच्या मनमानी कारभारामुळे बाजार समितीचे २० ते २५ कोटींचे आर्थिक नुकसान झाले आहे, असा ठपका चौकशी अधिकारी विजय पाखले यांच्या नेतृत्वाखालील चार सदस्यीय समितीने ठेवला आहे. या संदर्भातील माहिती तक्रारदार संजय कोकाटे यांनी शुक्रवारी (ता. ७) पत्रकार परिषदेत दिली.

कोकाटे म्हणाले, ‘‘शिंदे हे जिल्हा परिषदेचे अध्यक्ष असल्याने त्यांच्या दबावामुळे तक्रारीची दखल घेतली जात नव्हती. पण, सातत्याने पाठपुरावा केला. त्यामुळे चौकशी अधिकारी नियुक्त केले. त्यांनी चौकशी अहवाल जिल्हा उपनिबंधकाकडे सादर केला आहे. संस्थेने चारा छावणी उभारताना अनेक चुका केल्या. त्यामुळे समितीला नाहक दंड भरावा लागला. या व इतर प्रकरणामुळे सुमारे २० ते २५ कोटी रुपयांचे सरकारी नुकसान झाले आहे.``

‘‘बाजार समितीचे संचालक व सचिवांनी त्यांचे नातेवाईक व संबंधितांना अत्यल्प भाड्याने गाळे दिले. त्यांच्याकडे लाखो रुपयांची थकबाकी आहे. कोणत्याही परवानग्या न घेता बाजार समितीच्या जागांवर गाळे बांधण्यात आले आहेत. त्या जागांची व बांधकामाची नोंदही नाही. बांधकाम न केलेल्या संस्थांना मोठ्या रकमा देऊन गैरव्यवहार केल्याचा ठपकाही या अहवालात ठेवण्यात आला आहे``, असे कोकाटे यांनी सांगितले.

या प्रकरणाची चौकशी पाखले यांच्यासह लेखापरीक्षक एम. सी. मुंडासे, उपलेखा परीक्षक एस. बी. शिंगाडे व अप्पर विशेष लेखापरीक्षक जी. पी. पोतदार यांनी केली. मी केलेल्या नऊ तक्रारींत तथ्य असल्याचे अहवालात म्हटले आहे. चौकशी अहवालाची दखल घेऊन सरकारने संबंधितांवर कारवाई करावी, अन्यथा त्या विरुद्ध उच्च न्यायालयात याचिका दाखल करणार आहे, असेही कोकाटे यांनी सांगितले.