कपाशीचे पीक बोंडअळीच्या घशात

किनगाव ः कापूस राज्यातील दुसरे महत्त्वाचे नगदी पीक असून नैसर्गिक आपत्तीने जिल्हाभरातील उत्पादक शेतकरी सध्या अडचणीत आले आहेत. प्रतिकूल हवामानामुळे यंदा कापसाच्या उत्पन्नात घट झाली आहे. बी. टी. संकरित वाणाच्या सर्व कंपनीच्या पिकावर सध्या ठिपक्‍याच्या बोंडअळीने थैमान घातले आसून कापूस लागवड शेतकरी चिंतेत आहेत. किनगावसह सोणवणेवाडी, हंगेवाडी, चाटेवाडी, सिरसाठवाडी, कोळवाडी, दगडवाडी या गावांतील जवळपास शंभरावर शेतकऱ्यांनी कापूस लागवड केली. खत व फवारणी खर्च करून, विद्युत पुरवठ्याच्या अनंत अडचणीला सामोरे जाऊन पाणी देऊन कापसाचे पीक जगवले. या वर्षी बोंडअळीमुळे शेतकऱ्यांचे पंचाहत्तर टक्‍क्‍यांपेक्षा अधिक नुकसान झाले आहे. प्रशासनाच्या वतीने तलाठी, ग्रामसेवक व कृषी सहायक यांच्या सहकार्याने बोंडअळी प्रभावित शेतीचे पंचनामे करणे चालू झाले आहेत. दरम्यान, जिल्हाभरात कापसाची हीच स्थिती आहे.