रिक्त पदांचा योजनांच्या अंमलबजावणीवर परिणाम

अकोला ः जिल्ह्यात कृषी विभागातील अनेक महत्त्वाची पदे रिक्त असल्याने त्याचा थेट परिणाम योजनांच्या अंमलबजावणीवर होत अाहे. काही योजनांचा पैसा खर्च न झाल्याने परत जात अाहे. वर्षानुवर्षे कृषी विभागात रिक्त असणारी पदे भरण्यासाठी ठोस उपाययोजना केल्या जात नसल्याची दुर्दैवी स्थिती अाहे.

जिल्ह्यात कृषी सहायकापासून तर तालुका कृषी अधिकाऱ्यांपर्यंत ही पदे ठिकठिकाणी रिक्त अाहेत. रिक्त पदांमुळे प्रशासनाची झालेली अडचण गेल्या काळात अकोट तालुक्यामुळे राज्यभर पसरली अाहे. तेथे तालुका कृषी अधिकारी पदाचा प्रभार चक्क कृषी सहायकाकडे देण्याची नामुष्की झाली होती. त्यानंतरही हे पद भरलेले नाही. पातूर तालुका कृषी अधिकारी अकोटचा कारभार पाहत अाहेत. या तालुक्यात मंडळ अधिकारीपदेही रिक्त अाहेत. परिणामी बहुतांश कामे कृषी सहायकांना पुढे न्यावी लागत अाहेत. तेल्हारा तालुक्यातही कर्मचाऱ्यांची कमतरता अाहे. या ठिकाणी प्रभारी तालुका कृषी अधिकारी कामकाज सांभाळत अाहेत. बाळापूर तालुक्याची ‘प्रभारी’ तालुका म्हणून अमरावती विभागात अोळख निर्माण झाली अाहे.

या ठिकाणी गेली सात ते अाठ वर्षे तालुका कृषी अधिकारी पदाची जबाबदारी मंडळ अधिकारी सांभाळत अाहेत. दरवर्षी अधिकाऱ्यांच्या बदल्या होतात. पण बाळापूरला पूर्णवेळ तालुका कृषी अधिकारी का दिला जात नाही, हे एक कोडेच अाहे. मंडळ कृषी अधिकाऱ्यांचीही पदे जिल्ह्यात रिक्त अाहेत. अाता खरीप हंगाम सुरू झाला असून विविध योजनांची अंमलबजावणी केली जात अाहे. रिक्त पदांचा परिणाम योजनांच्या अंमलबजावणीवर होत अाहे. प्रामुख्याने दुप्पट उत्पन्न करण्यासाठीच्या प्रयत्नांना खीळ बसत अाहे.