गूळ दर घसरणीवर ठोस उपायांची गरज

कोल्हापूर : यंदाच्या हंगामात गुळाला दर मिळण्याचे सर्व अंदाज फोल ठरवित गेल्या महिन्यापासून गूळ दर पुन्हा घसरले आहेत. हंगामाच्या प्रारंभी चार हजार रुपये क्विंटलच्या आसपास असणारे दर डिसेंबरच्या शेवटच्या आठवड्यापर्यंत सरासरी तीन हजार रुपयांवर आले आहेत. तीन महिन्यांत तब्बल एक हजार रुपयांची घसरण झाल्याने गूळ उत्पादकांचा पुरता अपेक्षाभंग झाला आहे.  गुजरातमधील बाजारपेठांत बाहेरचा गूळ येत असल्याने पूर्ण क्षमतेने गूळ खरेदी करण्यात व्यापारी कचरत आहेत. व्यापाऱ्या व्यापाऱ्यांत गूळ खरेदी करण्यासाठी स्पर्धा नसल्याने त्याचा विपरीत परिणाम दर घसरणीवर होत आहे. बाजार समितीत चार जानेवारीस याबाबत बैठक घेत आहे. पण केवळ बैठक न घेता दर घसरणीवर काही तरी ठोस उपाय होण्याची गरज आहे. साधारणत: साखरेचे दर जितके असतील त्याच दरम्यान गुळाचेही दर असतात. जशी साखरेच्या दरात घसरण झाली. तशीच घसरण गुळाच्या बाबतीतही झाली. फक्त साखर घसरणीची कारणे वेगळी होती. गुळाच्या दरात घसरणीची कारणे वेगळी दिली. पण या खेळात गूळ उत्पादक भरडला जात आहे.  जिल्ह्यात सुमारे एक हजार गुऱ्हाळांची नोंदणी असली तरी उत्पादकांनी दिलेल्या माहितीनुसार केवळ तीनशे ते चारशे गुऱ्हाळेच सुरू आहेत. सध्या बाजार समितीत दहा ते पंधरा हजार गूळ रव्यांची आवक होत आहे. पण दर पडलेला असल्याचे उत्पादन वाढूनही तोट्याचाच सामना गूळ उत्पादकांना करावा लागत आहे.